Pas një pritjeje të gjatë dhe shumë emocionale për fansat, BTS po rikthehet zyrtarisht në skenë si grup i plotë. RM, Jin, Suga, J-Hope, Jimin, V dhe Jung Kook janë ribashkuar pas përfundimit të shërbimit të detyrueshëm ushtarak, duke shënuar një nga momentet më të shumëpritura në industrinë muzikore globale.
Rikthimi i tyre i madh do të ndodhë në “The Tonight Show Starring Jimmy Fallon”, ku grupi do të jetë i ftuar për një intervistë dhe performancë më 25 mars, e ndjekur nga një tjetër performancë më 26 mars.
Një “pushtim” dy-netësh që pritet të ndezë rrjetin dhe audiencën në mbarë botën.
Ky rikthim nuk është aspak rastësor. Më 20 mars, BTS publikon albumin e tyre të pestë në studio, “Arirang”, duke nisur një epokë të re për grupin.
Vetëm një ditë më pas, më 21 mars, fansat do të kenë mundësi të ndjekin eventin global të transmetuar drejtpërdrejt “BTS The Comeback Live | Arirang” në Netflix, i cili do të vijë nga Gwanghwamun në Seul.
Ndërkohë, më 27 mars do të publikohet edhe dokumentari “BTS: The Return”, që do të zbulojë prapaskenat dhe rrugëtimin drejt këtij rikthimi të madh.
Herën e fundit që BTS performoi si grup i plotë në skenën e Jimmy Fallon ishte në vitin 2021, gjatë epokës së “Butter” dhe “Permission to Dance”. Që nga ajo kohë, anëtarët janë fokusuar në projekte solo.
Tani, pas vitesh pritjeje, rikthimi i tyre shënon një moment historik për fansat dhe industrinë muzikore, dhe gjithçka tregon se kjo është vetëm fillimi i një kapitulli të ri për BTS.
