North West po hedh hapat e parë në botën e biznesit në moshë shumë të re, duke u përgatitur për lançimin e markës së saj të veshjeve dhe bizhuterive.
Nëna e saj, Kim Kardashian, ka paraqitur zyrtarisht kërkesë për regjistrimin e markës tregtare “NOR11”, duke sinjalizuar krijimin e kompanisë së parë të vajzës së saj.
Sipas The Sun, janë dorëzuar tre aplikime të veçanta për markën, që përfshijnë një gamë të gjerë produktesh. Koleksioni parashikohet të përfshijë veshje dhe aksesorë si fustane, këpucë, kapele dhe çorape, por edhe bizhuteri si byzylykë, gjerdanë, vathë e unaza, si dhe çanta, portofole dhe kuti kozmetike.
Kjo sugjeron krijimin e një linje të plotë stili jetese dhe jo thjesht një koleksion të kufizuar.
Emri “NOR11” besohet të jetë një kombinim i tre shkronjave të para të emrit të North me moshën që ajo kishte kur lindi ideja për projektin. Aplikimet janë paraqitur në emër të kompanisë KimYe’s Kid Inc., e themeluar në Kaliforni në vitin 2023, një referencë që lidhet me Kim-in dhe ish-bashkëshortin e saj, Kanye West.
Megjithatë, dokumentet zyrtare tregojnë se Kim është drejtuesja e vetme e sipërmarrjes.
Projekti duket se po trajtohet me seriozitet të lartë biznesi, pasi adresa e regjistruar e kompanisë lidhet me menaxherin afatgjatë të Kardashian, i cili ka menaxhuar edhe çështjet profesionale të Britney Spears.
Në dhjetor, North publikoi foto me miqtë e saj duke veshur kapele me logon “NOR11”, që besohet se shërbyen si prezantimi i parë i heshtur i markës së re, duke paralajmëruar hyrjen e saj në industrinë e modës.
