Përditësimi më i fundit i “software” nga Apple, iOS 16.4, është i disponueshëm nga sot për modelet iPhone, duke nisur që nga iPhone 8 e deri te modelet më të reja. Sistemi operativ vjen me risi, që përfshijnë 21 “emoji” të reja në tastierë. Por, më e rëndësishmja është përmirësimi i izolimit të zërit, që bllokon zhurmat në sfond kur je duke folur në celular.
Disa ditë më parë u njoftua se Apple po punon për një celular të palosshëm iPhone, edhe pse gjithmonë ka mohuar se ka ndërmend ta lançojë në periudhën afatshkurtër. Apple vazhdimisht është shprehur se, nuk dëshiron të lançojë një iPhone të palosshëm në afat të shkurtër, megjithatë, kompania vazhdon të marrë patenta të reja.
Kompania amerikane po punon për më shumë se një prototip të palosshëm të iPhone, i cili u shfaq në një patentë të re për teknologjinë e ekranit të palosshëm në Zyrën e Markave dhe Patentave të SHBA-së (USPTO). Sipas deklaratës së patentës, pajisja do të ketë një sensor të ngjashëm me përshpejtuesin që do të zbulojë kur iPhone ju bie në tokë.
