Sindikata e aktorëve amerikanë SAG-AFTRA ka rënë dakord për një marrëveshje me drejtuesit e studiove të Hollivudit për t’i dhënë fund një greve historike 118-ditore. Në një njoftim, sindikata tha se greva më e gjatë në historinë e tij do të përfundojë në orën 12:01 të mëngjesit pas një votimi unanim. Sindikata, e cila përfaqëson rreth 160,000 anëtarë të industrisë, ka qenë në grevë që nga 14 korriku duke shkaktuar ndërprerje të mëdha në prodhimet e Hollivudit.
Marrëveshja vjen pasi komiteti negociues i sindikatës kaloi ditë të tëra duke diskutuar mbi disa pika që i konsideronte “thelbësore”, duke përfshirë inteligjencën artificiale. Ai pasoi një ofertë të fundit, më të mirë dhe përfundimtare nga Aleanca e Prodhuesve të Filmit dhe Televizionit, grupi që përfaqëson studiot, shërbimet e transmetimit dhe prodhuesit në negociata. “Marrëveshja paraprake do të shkojë në bordin kombëtar të Sag-Aftra të premten për shqyrtim”,-njoftoi sindikata.
Gjatë gjithë grevave, aktorët e Hollivudit duke përfshirë fituesin e çmimit Oscar Jamie Lee Curtis, regjisoren amerikane Olivia Wilde dhe Jason Sudeikis, kanë qenë të prirur të tregojnë solidaritetin e tyre. Rikujtojmë, se negociatat mes studiove kryesore të Hollivudit dhe aktorëve u pezulluan një muaj më parë, që do të thotë se prodhimi i serialeve dhe filmave të caktuar është pezulluar gjithashtu. Aktorët kanë bërë thirrje për pagesë më të mira për përmbajtjen e transmetimit dhe kontroll më të mirë mbi përdorimin e inteligjencës artificiale.
