Çmimi Nobel në Mjekësi i është dhënë një çifti shkencëtarësh që zhvilluan teknologjinë që çoi në vaksinat mRNA gjatë pandemisë së koronavirusit. Doktorët Katalin Kariko dhe Drew Weissman janë ata që do të ndajnë çmimin. “Zbulimi i tyre ndryshoi rrënjësisht të kuptuarit tonë se si mRNA ndërvepron me sistemin tonë imunitar”,-tha paneli që dha çmimin, duke shtuar se puna kontribuoi në shkallën e paprecedentë të zhvillimit të vaksinave gjatë një prej kërcënimeve më të mëdha për shëndetin e njeriut në kohët moderne.
Teknologjia ishte eksperimentale para pandemisë, por tani u është dhënë miliona njerëzve në mbarë botën. E njëjta teknologji mRNA tani po hulumtohet për sëmundje të tjera dhe madje edhe për kancerin. Ndërkaq, rreth 400 milionë doza të vaksinës Pfizer-BioNTech dhe 250 milionë doza të vaksinës Moderna janë administruar tani në Shtetet e Bashkuara. Qindra miliona të tjera janë dhënë në mbarë botën. Përdorimi i mRNA ka mundësuar që të dyja vaksinat të përditësohen kundër varianteve të reja.
