Presidenti i SHBA-së Joe Biden, tha të mërkurën se “ksenofobia” e treguar nga Kina, Japonia dhe India po pengon rritjen e tyre ekonomike, pasi ai argumentoi se migrimi ka qenë i mirë për ekonominë amerikane.
“Një nga arsyet pse ekonomia jonë po rritet është për shkak jush dhe shumë të tjerëve. Pse? Sepse ne i mirëpresim emigrantët,” tha Biden në një aktivitet për mbledhjen e fondeve në Uashington për fushatën e tij elektorale në vitin 2024.
“Pse Kina po ngec kaq keq ekonomikisht, pse Japonia ka probleme, po Rusia, po India, sepse ata janë ksenofobë. Ata nuk duan emigrantë. Emigrantët janë ata që na bëjnë të fortë.”
Fondi Monetar Ndërkombëtar parashikoi muajin e kaluar se çdo vend do të shihte një ngadalësim të rritjes së tij ekonomike në 2024 nga një vit më parë, duke filluar nga 0.9% në Japoninë shumë të zhvilluar në 6.8% në Indinë në zhvillim.
Ata parashikojnë se Shtetet e Bashkuara do të rriteshin me 2.7%, pak më e shpejtë se norma e saj prej 2.5% vitin e kaluar. Shumë ekonomistë ia atribuojnë performancën më të mirë se sa pritej pjesërisht migrantëve që zgjerojnë fuqinë punëtore të vendit.
Shqetësimi për migrimin e parregullt është bërë një çështje kryesore për shumë votues amerikanë përpara zgjedhjeve presidenciale të nëntorit.
Biden, i cili e ka dënuar retorikën e kundërshtarit të tij republikan Donald Trump si anti-emigrant, ka punuar për të krijuar marrëdhënie të gjera ekonomike dhe politike me vende, përfshirë Japoninë dhe Indinë, për t’iu kundërvënë Kinës dhe Rusisë.
