Studentët i janë drejtuar me një kërkesë rektorit Arben Gjata që të kenë përkrahjen e Universitetit të Mjekësisë për protestën e tyre, ndërsa bojkotin e procesit mësimor po e vijojnë prej rreth tre javësh tashmë. Ata kërkojnë marrjen e masave për të mos lejuar pedagogët që “të ushtrojnë presion të çdo forme ndaj studentëve, me qëllim detyrimin për ndalimin e bojkotit”. Brenda të premtes së ardhshme, më 27 tetor, studentët presin një përgjigje prej rektorit, në të kundërt ata thonë:
Ne do të jemi të detyruar të intensifikojmë lëvizjen tonë, me marrjen e masave përshkallëzuese.
Në kërkesën drejtuar rektorit Gjata, thuhet:
I nderuar Z. Rektor, siç jeni në dijeni, ne studentët e degës Mjekësi e Përgjithshme jemi prej tri javësh në bojkot të procesit mësimor të vitit akademik 2023-2024. Lëvizja jonë ka përfshirë protesta, bojkotin dhe tashmë nisjen e ndjekjes ligjore në Gjykatën Kushtetuese me qëllim shfuqizimin e ligjit nr. 60/2023 “Për trajtimin e veçantë të studentëve që ndjekin programin e studimit të ciklit të dytë ‘Mjekësi e Përgjithshme’ në institucionet publike të arsmit të lartë”. Në këtë situatë ne kërkojmë mbështetjen tuaj si titullar i UMT si më poshtë vijon:
Deklarimin tuaj publik se Universiteti nuk do të na paraqesë asnjë kontratë në zbatim të ligjit nr 60/2023 deri në përfundim të shqyrtimit të padisë sonë nga GjK.
Deklarimin tuaj publik se Universiteti dhe Ju personalisht jeni në krah të studentëve dhe na mbështesni në lëvizjen tonë.
Marrjen e masave për të mos lejuar pedagogët të ushtrojnë presion të çdo forme ndaj studentëve me qëllim detyrimin për ndalimin e bojkotit.
Nisur nga situata jonë emergjente, keni kohë të na ktheni përgjigje mbi kërkesat e mësipërme deri të premten, më datë 27 tetor 2023. Në rast të një mosreagimi nga ana Juaj do të jemi të detyruar të intensifikojmë lëvizjen tonë me marrjen e masave përshkallëzuese.
