Policia spanjolle ka arrestuar tre lojtarë të paidentifikuar rezervë të Real Madridit, pasi dyshohet se kanë shpërndarë një video seksuale me një të mitur. Lojtarët, të cilët nuk janë të mitur, u lanë të lirë pas një vendimi gjyqësor dhe pasi u sekuestruan të dhënat në celularët e tyre. Rasti rrjedh nga një ankesë e paraqitur nga nëna e një vajze 16-vjeçare në Ishujt Kanarie lidhur me një regjistrim të dyshuar të marrëdhënieve seksuale.
Ndërkohë që vajza pohoi se marrëdhëniet ishin konsensuale, regjistrimi u bë në qershor pa pëlqimin e saj dhe se ajo ishte vënë në dijeni së fundmi. Arrestimet vijnë mes akuzave për abuzim seksual kundër ish-shefit të federatës së futbollit Luis Rubiales, i cili puthi në buzë fituesen e Kupës së Botës të Spanjës Jenni Hermoso.
Policia tha se tre lojtarët ishin ndaluar në kompleksin sportiv të Real Madrid dhe një lojtar i katërt ishte duke u hetuar. Një nga të arrestuarit është një lojtar rezervë dhe dy luajnë për ekipin e tretë. Sipas gazetës El Confidencial, subjekti kryesor i hetimit është një lojtar i ekipit të tretë, i cili dyshohet se ka regjistruar marrëdhënien e tij seksuale me 16-vjeçaren.
