Komisioni i Posaçëm për Reformën Zgjedhore zhvilloi punimet online ndërsa në rend të ditës ishin dëgjesat me drejtuesit e partive politike në vend. Bashkëkryetari socialist, Damian Gjiknuri konfirmoi se janë nëntë parti që kanë shprehur dëshirën për të marrë pjesë në dëgjesën online dhe për të dhënë qëndrimet e tyre.
Nuk u paraqitën online kryetari i Partisë Agrare Ambientaliste, Agron Duka, kreu i Partisë Bashkimi Për të Drejtat e Njeriut, Vangjel Dule dhe drejtuesi i Partisë Republikane, Fatmir Mediu.
Mediu, Duka e Dule janë anëtarë të Komisionit të Reformës Zgjedhore dhe mund të marrin pjesë kur të duan, pasi mund të ngrenë zërin dhe për ata që nuk janë pjesë.
Fillimisht fjalën e mori kreu i partisë Aleanca Demokratike, Eduart Abazi.
Eshtë hequr sistemi i balotazhit dhe ne e ndjejmë këtë shqetësim. Kjo mund të shikohet e të moderohet sepse ku ka garë duhet të ketë dhe barazi. Shqipëria brenda një harku kohor 10-12 vite, kishte nevojë për të siguruar një pjesëmarrje të lartë të së drejtës së votës. Ky ishte problemi i parë dhe do të shtoja deri në vitin 2005, ne kishim probleme me sistemin mazhoritar.
Abazi kërkoi aplikimin e votimit elektronik dhe listat e hapura ndërsa si problem solli sigurinë e votës.
Dashamir Shehi, kryetari i Lëvizjes për Zhvillim Kombëtar, paraqiti katër kërkesa.
Unë jam për katër pikat. I kam dorëzuar me shpresën se do të ndërtohet me referendum, nuk kam entuziazëm se do të hyhet kaq thellë. Mendimi im bazë është ky, që qytetarët shqiptarë duhet që të kenë një të drejtë proporcionale, jemi për proporcional kombëtar, ligji të punojë kudo edhe për qarqe të vogla, listat të hapen deri në fund.
Edhe mund të ndodhin probleme, por me komisionerët na kanë ndodhur probleme, të bëhet me elektronik. Duhet me pas kurajë që kjo punë të bëhet, kanë shkuar para publike sa të duash, ia vlen të harxhohen ca, 2-3% të votave të numërohen edhe me mënyrë fizike, të bëhet elektronik që të hiqet kjo zullumnaja e komisionerëve.
Ne flasim për modernizim, por kur vjen puna tek vota është e dyshimtë. Jam për të votuar emigrantët, mund të votohet me postë elektronike, ka miliona në botë që e bëjnë, kurse ne s’paskemi?!
