Vitin e kaluar WhatsApp prezantoi mundësinë e dërgimit të fotove dhe videove me rezolucion të lartë, por përdoruesit duhej ta zgjidhnin manualisht dhe individualisht atë përmbajtje e cila përfundimisht nuk ishte një zgjidhje ideale. Megjithatë, kjo është gati të ndryshojë.
Një përditësim i ri për aplikacionin WhatsApp sjell mundësinë për të dërguar automatikisht të gjitha fotot dhe videot në HD duke përdorur një buton të ri të Cilësisë së Ngarkimit të Medias për të zgjedhur cilësinë e ngarkimit të medias, që ndodhet në menynë Ruajtja dhe të dhënat.
Kur përdoruesi zgjedh opsionin “Cilësia standarde”, marrësi do të marrë median në një skedar të ngjeshur me qëllimin e dërgimit më të shpejtë duke ruajtur një cilësi më të ulët. Nga ana tjetër, cilësia HD zë gjashtë herë më shumë hapësirë dhe do të dërgohet më ngadalë.
Butoni do t’i lejojë përdoruesit të dërgojnë skedarë specifikë në cilësi të ndryshme kur është e nevojshme. Funksioni është tashmë i disponueshëm për disa testues dhe pasi të zgjidhen të gjitha problemet, ai do të jetë edhe në versionin stabil të WhatsApp, kështu që aplikacioni duhet të përditësohet rregullisht përmes Dyqanit të Google Play.
WhatsApp duket se ka nxjerrë një sërë përditësimesh në ditët e fundit për përdoruesit e versionit beta. Ndërsa shumë nga këto përditësime adresojnë shqetësime të ndryshme, shumë prej tyre prezantojnë veçori të reja që përdoruesit mund t’i testojnë. Me versionin beta të WhatsApp, aplikacioni po e rrit gjatësinë e videove që përdoruesit mund t’i publikojnë në storiet e tyre.
Aktualisht, përdoruesit e aplikacionit mund të postojnë video deri në 30 sekonda në storiet e tyre, por versioni beta e rrit gjatësinë e tyre në 1 minutë. Por, mesa duket ky funksion është i disponueshëm vetëm për testuesit beta të WhatsApp në Android. Aplikacioni popullor i mesazheve ende nuk e ka konfirmuar se kur kjo veçori do të jetë e disponueshme për të gjithë.
