Arsyet pse “Roar” të del në listën e gjërave për t’u parë janë disa. Seriali bazohet në një libër me novela të Cecelia Ahern (shkrimtarja që u bë shumë e famshme me “P.S. I Love You” apo “If You Could See me now”), ka për protagoniste Nicole Kidman, Issa Rae, Cynthia Erivo e të tjerë yje hollywood-i, dhe producentët janë ata të serisë jo pak të suksesshme të Netflix, Glow (2017 – 2019).
![](https://www.topalbaniaradio.com/v7/wp-content/uploads/2022/05/WhatsApp-Image-2022-05-03-at-6.15.12-PM.jpeg)
Titulli i çdo episodi është edhe përmbledhja e ndodhisë, madje aq jo-metaforik është ai, sa ndonjëherë nuk i lë vend fare imagjinatës. Një nga episodet, ai me Nicole Kidman, quhet “The Woman Who Ate Photographs”/”Gruaja që hante fotografi”, në të cilin personazhi që interpretohet nga Kidman, e cila përkujdeset për nënën e saj që vuan nga demenca, ha fotografi (literalisht) për të ndjerë nostalgjinë fuqimisht si visuale ashtu edhe fizike, njësoj si të ishte duke e ri-jetuar atë moment të viteve më parë. Ka sidoqoftë tituj që përziejnë metaforën dhe literalen bashkë si – “The Woman Who Found bite Marks on her Skin” / “Gruaja që gjeti shenja kafshimesh në trupin e saj”, ku personazhi i jetësuar nga Erivo, një grua në detyrë të lartë ekzekutive, mbasi kalon një lindje të vështirë, në kohën që i duhet të kthehet në punë, zgjohet çdo ditë me trupin e saj të mbuluar nga kafshime të gjakta e të dhimbshme, nga ato që lë ndjenja e fajit, një ndjenjë që njihet shumë mirë nga prindërit në karrierë. Është aq familjare kjo shije e hidhur e ‘braktisjes’, qoftë edhe për pak të të vegjëlve të tu për t’u marrë me punë, nga shumë prej nesh që kemi fëmijë. Nënat e jetojnë akoma edhe më shumë.
Në episodin e quajtur “The Woman Who Dissapeared” / “Gruaja që u zhduk”, Rae është një shkrimtare e një auto-biografie e cila po joshet nga producentë Hollywood-i për ta kthyer librin e saj në një film?!.. jo lojë të Realitetit Virtual (AR). Ajo fillon të ‘shpërbëhet’ kur përballet me tre burra të bardhë (stereotipi i përballjes së një afro-amerikaneje me të bardhët në SHBA). “The Woman who Was Fed Up by a Duck” / “Gruaja që u lodh nga një rosak” tregon historinë e një gruaje në një farë moshe luajtur nga Merrit Wever, e cila e lodhur nga burrat të nisë një marrëdhënie me një rosak të parkut ku shkonte çdo ditë për të studiuar. Marrëdhënia është tipike e rracës njerëzore. Nis si diçka ndryshe, ekzotike, digjet nga pasioni (po, ka një skenë erotike ku rosaku e bën Wever të arrijë orgazma të shumëfishta) dhe përfundon në një marrëdhënie agresive ndërvarësie, me një fund të pashmangshëm, të pritshëm.
![](https://www.topalbaniaradio.com/v7/wp-content/uploads/2022/05/WhatsApp-Image-2022-05-03-at-6.22.54-PM.jpeg)
Kështu edhe pse titujt metaforikë ose literalë tregojnë shumë dhe aspak, është interesante kur kupton thjeshtësinë e këtyre historive bazuar në klishe, por rrëfyer bukur. Çdo faqe e serialit i kushtohet një gruaje, e cila është – ose ndihet – e padëgjuar, e pa-përfillur, e pakonsideruar. Epitomi i “Roar” {gojës[ët] së shqyer që kërkon të ulërasë në siglën e serialit} është “The Woman Who Was Kept on a Shelf” / “Gruaja që mbahej në Raft” ku Betty Gilpin luan një ish modele e cila joshet nga një burrë me pushtet dhe me para. Ky i fundit vendos që ajo të jetë trofeu i tij, dhe i ndërton asaj një raft empirik në mes të murit të lartë të dhomës së tij të punës. Në një nga episodet më të bukura, fuqia e “Roar” (Ulëri) është pikërisht kjo, ti çosh përtej ato histori që i marrim të mirëqëna çdo ditë, të veshësh vulgaren me art.
![](https://www.topalbaniaradio.com/v7/wp-content/uploads/2022/05/WhatsApp-Image-2022-05-03-at-6.22.52-PM.jpeg)
Episodet më lart, apo “The Girl Who Loved Horses” si edhe ai më komiku, “The Woman Who Solved Her Own Murder”, janë shumë argëtuese, e duhet thënë edhe më argëtues se vetë libri ku bazohen. Janë të xhiruara me një ndjeshmëri të lartë artistike dhe me performanca që i kalojnë ato të ekranit të vogël të televizorit. Po ashtu fakti që e përbashkëta e tyre është vetëm tema dhe asgjë tjetër, të bën ti shijosh edhe më ndryshimin e çdo gjëje nga seria në seri.
Tek “The Woman Who Returned Her Husband” (episodi im i preferuar), një grua në moshën e tretë, kërkon të kthejë burrin e saj, pasi nuk e përmbushte më, ai nuk ishte më interesant, dhe vitet kishin bërë të vetën. Meera Syal realizon një shëmbyllturë të grave kudo-ndodhen në moshën e saj edhe pse realiteti që ajo jeton është një utopi. Mbasi e shikon të vjen natyrshëm pyetja – a nuk do kishte qënë më mirë të ishte e vërtetë, që burrat të bliheshin në pazar?!.
![](https://www.topalbaniaradio.com/v7/wp-content/uploads/2022/05/WhatsApp-Image-2022-05-03-at-6.22.49-PM.jpeg)
Në frymën e Charlie Brooker – dhe “Black Mirror” të Netflix, “Roar” i AppleTv është absolutisht i këndshëm, argëtues dhe sfidues. Sigurisht mund të ishte shumë më tepër sesa një përkëdhelës i po sikur-eve të shoqërisë moderne, e rëndësishme është që funksionon. Provokon dhe e bën audiencën të mendojë. Kjo e fundit ka shumë vlerë…
Gjithmonë nëse ndodh… “Roar” i krijon të gjitha kushtet; mendjen e ndani ju…