Lamtumirat nuk janë kurrë të lehta. Mund të jenë të sikletshme e të çuditshme ndonjëherë dhe pikërisht për këtë The National dhe Bon Iver na flasin në “Wierd Goodbyes”. Ndoshta kemi qenë pak si shumë të zënë duke u marrë me albumin e ri të Beyoncé sa i kemi lënë pak pas dore hitet e saj të kaluara.
Për ta shlyer këtë, sjellim në listën e kësaj jave jo një por dy këngë, “End Of Time” dhe “Telephone”, në bashkëpunim me Lady Gaga. Besojmë e mbani mend se sa bujë ka bërë asokohe apo jo?
Aiello vazhdon të hedhi hapa të mëdhenj në karrierën e tij dhe duke qenë një artist kaq i talentuar dhe premtues, është e paevitueshme të mos e përfshijmë herë pas here në playlist-ën tonë. Këtë herë e sjellim së bashku me “Vienimi (a ballare)”.
Shakira është momentalisht një nga emrat që po bën më shumë ‘zhurmë’ në media e fatkeqësisht jo për muzikën e saj. E kemi fjalën për stuhinë mediatike mes saj, ish-bashkëshortit dhe të dashurës së tij të re. Thënë kjo, lind pyetja, a mund të jetë vërtetë “Te Felicito” një dedikim për këtë histori?
Për të kaluar më pas tek Survivor… Ne e kemi pak të vështirë apo thuajse të pamundur të dëgjojmë “Eye Of The Tiger” pa na shkuar mendja tek Rocky Balboa, por ju provojeni njëherë vetë…
