Disa nga këngët e reja që janë publikuar këtë javë kanë kryesisht një pjesë të shkëputur nga këngë të vjetra shqiptare nga të cilat kanë marrë referenca për tekstin e melodinë. Disa prej tyre janë: MatoLale me “Vaçe Zela”, Irkenc Hyka me “Male” dhe Skerdi me “Xinxerfille”.
Nga ana tjetër ka patur edhe shumë bashkëpunime mjaft të përsosura midis artistëve. Fifi dhe Offchestra sjellin një projekt mjaft energjik që titullohet “Edhe pak”. Stresi dhe One T kanë sjellë një pjesë të dytë të bashkëpunimit të tyre dhe kanë vendosur ta titullojnë “Mos u dorzo 2”. Një bashkëpunim tjetër vjen midis Arbresha dhe Bardhit, të cilët e kanë titulluar “Luj Zemër”.
Pjesë e “Albanian’s Hot Top 30” janë gjithashtu edhe artistë të rinj të cilët na surprizojnë me projektet e tyre muzikore. Lore vjen sërish me një këngë të re, këtë herë dedikuar dashurisë dhe mban titullin “Të Du”. Pas suksesit të “Tolerom”, Argjend Gjigja vjen me “INDIGO / pase lo que pase”. Grupi i rock-ut Rool vjen me këngën e tyre të parë, të cilën e kanë realizuar në gjuhën angleze titulluar “All Star”.
Vajzat e industrisë tonë muzikore kurrë nuk zhgënjejnë. Pamë një rikthim të fuqishëm të Era Istrefit me këngën e re “Mona Lisa” dhe me një videoklip mjaft mirë të realizuar në bazë të tematikës së vetë këngës. Olta Boka së fundmi është bërë nënë për herë të dytë, por gjithashtu ka lançuar edhe projektin e saj të fundit “Më shumë se ti”. Ndërsa Dhurata Dora vjen me një këngë mjaft ritmike të realizuar në prag të hapjes së sezonit veror, titulluar “Sheqer”, projekt i cili pritet të mbushë koncertet e saj.
Powered by The Top List © / Top Awards