Një javë plot ritëm që është e pashmangshme të mos ngriheni dhe të kërceni! A e dini pse? Kjo javë është mjaft e veçantë ku fokusi kryesor janë ‘Millenial Hits’… E dimë që kur themi këtë, mendja na shkon detyrimisht tek “All That She Wants” nga Ace of Base. E keni parasysh besojmë historinë se si shqiptohej dikur ky titull…
Playlist-a e kësaj jave bazohet kryesisht tek hitet që ‘millenials’ dëgjojnë më së shumti në platformat muzikore si Spotify apo Deezer. E madje jo vetëm kaq, por të tilla këngë na shoqërojnë edhe në emisionin e preferencave tuaja muzikore “Një këngë për ty” në Top Albania Radio, prandaj dhe zënë një vend të veçantë për ne.
“Pump Up The Jam” është e sigurtë që do t’ju fusë në një lloj nostalgjie që edhe nëse nuk i keni jetuar ato vite, nuk keni se si të mos e ndjeni afër vetes këtë hit. Ishte gjithashtu koha që Ambra Angiolini shkëlqente në skenë duke kënduar para se të kthehej në një yll filmash. Ju sjellim në kujtesë “T’appartengo” dhe “L’ascensore” të kënduara nga ajo.
“Macarena”, “You’re My Heart, You’re My Soul” apo “The Rhythm of the Night” do t’ju kthejnë pas në kohë tek disco-t e dikurshme, ku le ta pranojmë, bëhej më shumë qejf se tani. Për ta mbyllur dhe për t’ju lënë të shijoni këto këngë në qetësinë tuaj, një këshillë nga E-Rotic që ta keni parasysh këtë fundjavë, “Max Don’t Have Sex With Your Ex”… Besojmë e kuptuat mesazhin!
