Zv.kancelari i Gjermanisë, Robert Habeck nuk sheh asnjë shpresë për një fund të shpejtë dhe paqësor të luftës ruse në Ukrainë. Në një video të publikuar në platformën X, dikur Twitter, u shpreh:
Ne dëshirojmë paqen, por përgjigjja e sinqertë dhe e hidhur është: ndoshta nuk do të ketë një fund të shpejtë e të mirë edhe nëse dëshirojmë të kundërtën. Ne duhet të përshtatemi me situatën e kërcënimit. Çdo gjë tjetër do të ishte naive. Prandaj, Gjermania duhet të investojë më shumë për sigurinë e saj. Ne Gjermania dhe Bashkimi Europian, duhet të mbrohemi kudo, duke përfshirë sulmet ushtarake.
Lufta e presidentit rus, Vladimir Putin kundër Ukrainës është më e përgjakshmja që Europa ka parë që nga viti 1945.
Çdo ditë është një ditë vdekjeje dhe nuk ka fund. Përkundrazi, Rusia e Putinit po kalon plotësisht në një ekonomi lufte dhe po rrit masivisht prodhimin e armëve, tha Habeck, i cili gjithashtu është ministër i Ekonomisë. Unë fola në favor të furnizimit me armë në Ukrainë dhe ende jam në favor që ne të vazhdojmë t’i mbështesim ato gjithnjë e me më shumë pajisje ushtarake.
Unë gjithashtu e kuptoj shumë mirë se njerëzit kanë frikë nga një përshkallëzim i luftës. Unë jam gjithashtu i shqetësuar. Pyetja është se çfarë qëndrimi dhe çfarë veprimi është i nevojshëm për t’iu kundërvënë këtij kërcënimi. Qeveria do të duhet të merret me këtë, në mënyrë të vazhdueshme.
Habeck foli kundër “ngrirjes së luftës”.
Flitet për ngrirjen e luftës për shkak të numrit të madh të viktimave. Ky qëndrim shpërfill faktin se vetëm ukrainasit mund të vendosin se çfarë çmimi janë të gatshëm të paguajnë dhe me çfarë kushtesh duan për të arritur një armëpushim ose për t’i dhënë fund luftës.
Shefi i grupit parlamentar të Partisë Socialdemokrate, (SPD) Rolf Mützenich ka diskutuar një “ngrirje” të konfliktit. Me fjalë të tjera, një armëpushim për të mundësuar një zgjidhje të negociuar dhe u kritikua shumë për këtë.
Habeck shtoi se Putin do të shkatërrojë bashkimin dhe unitetin e Europës.
Nëse Putini është i suksesshëm me luftën e tij në Ukrainë, ai do të vazhdojë. Kjo është arsyeja pse është gjithashtu e rëndësishme për sigurinë në Gjermani dhe paqen në Europë që Ukraina të mbrohet me sukses e që Gjermania të ndihmojë.
