Ndërsa vijon megaoperacioni policor i koduar “Tempulli”, Komisariati i Policisë Nr. 4 në Tiranë evidentoi dhe goditi një rast të shitjes së lëndëve narkotike në doza, në afërsi të shkollave. Nga ky operacion u vunë në pranga dy shtetas, të kapur në flagrancë me doza kanabisi, në afërsi të një shkolle në Rrugën Bardhyl. U sekuestruan doza lënde narkotike kanabis, gati për shitje, një grirëse metalike dhe një automjet që përdorej për këtë veprimtari kriminale.
Shërbimet e Komisariatit të Policisë Nr. 4, në vijim të veprimeve intensive operacionale të kryera në kuadër të megaoperacionit policor mbarëkombëtar, antidrogë, të koduar “Tempulli”, pasi kanë siguruar informacion se dy shtetas shisnin lëndë narkotike kanabis, në afërsi të një shkolle në Rrugën Bardhyl, kanë organizuar punën për kapjen dhe vënien e tyre përpara përgjegjësisë ligjore.
Si rezultat, në afërsi të një shkolle në këtë rrugë, u kapën dhe arrestuan në flagrancë shtetasit D. Gj., 26 vjeç dhe A. B., 26 vjeç, banues në Tiranë.
Gjatë kontrollit fizik, shërbimet e Policisë iu gjetën këtyre shtetasve, sasi lënde të dyshuara narkotike kanabis, të ndara në doza, gati për shitje, dhe një grirëse metalike.
Nga verifikimet e kryera ka rezultuar se këta shtetas e siguronin lëndën narkotike në sasi dhe më pas e ndanin në doza, të cilat i shisnin në afërsi të shkollave.
Lënda narkotike, së bashku me grirësen metalike dhe automjetin që përdorej nga këta shtetas, u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Në një tjetër zhvillim, u njoftua se një 22-vjeçar u arrestua në Shkodër, i kapur duke shpërndarë doza kanabisi në qytet. I riu u prangos në bulevardin “Bujar Bishanaku”, teksa lëvizte me një automjet tip “Benz”. Arrestimi u bë po në kuadër të megaoperacionit policor të koduar “Tempulli”.
