Policia e Durrësit prangosi 17-vjeçarin që dje pasdite shkaktoi aksidentin tragjik rrugor me një viktimë e një të plagosur. Një person që lëvizte me biçikletë humbi jetën ndërsa i lënduar mbeti drejtuesi i një motoçiklete. I mituri ishte në timonin e një makine tip “Benz” e nga pamjet e siguruara rezulton se përveçse lëvizte me shpejtësi skëterrë, bëri edhe një parakalim të gabuar.
Një aksident u shënua sot në Tiranë pranë rrethit të Shkozës ku një makinë përfundon në Lanë ndërsa drejtuesi i mjetit u dërgua në spital. I lënduar mbeti një 35-vjeçar, i cili rreth orës 05:30 të mëngjesit humbi kontrollin e mjetit e doli nga rruga. Nisën hetime për zbardhjen e shkaqeve të këtij aksidenti.
Njoftimi zyrtar i policisë:
Më datë 04.05.2024, rreth orës 05:30, në afërsi të rrethit të Shkozës, shtetasi F. H., 35 vjeç, duke drejtuar automjetin dyshohet se ka humbur kontrollin mbi drejtimin e tij dhe si pasojë automjeti ka dalë nga rruga, duke rënë në lumin Lana. Drejtuesi i automjetit ndodhet në spital, nën kujdesin e mjekëve, ndërsa grupi hetimor po vijon punën për sqarimin e rrethanave të aksidentit.
Po sot, një aksident në aksin Tiranë-Dibër shkaktoi radhë të gjata automjetesh, në by-pass/in e mesëm të Qafë Murrizit. Nuk u raportua për të lënduar. Por, ky aksident u bë shkak për një varg makinash prej rreth 2 km në të dyja anët e rrugës, duke detyruar dhjetëra drejtues të prisnin. Grupi hetimor në vendngjarje nisi punën për sqarimin e rrethanave e më pas, situata u normalizua.
Një aksident ka ndodhur në aksin nacional Pogradec-Qafë Thanë në afërsi të fshatit Udënisht. Mësohet se një mjet përplasi një grua që po kalonte nga një krah i rrugës në krahun tjetër. Me shoferin e mjetit po bëhen veprime të mëtejshme procedurale ndërsa sa i përket të plagosurës është transportuar në spitalin e Pogradecit, ku ndodhet jashtë rreziku për jetën për fat të mirë.
