Gjyqeve për pronat dhe stokut të dosjeve nga të tilla procese, iu shtohet dhe Princ Leka II, i cili ka nisur betejën ligjore e kërkon kompensimin për tokat e gjyshit, Ahmet Zogut, në Mat. Duke i kujtuar trupës së Apelit se në vitin 2012, gjykata e njohu si trashëgimlënësin e Leka Zogut, Princ Leka II këmbëngul në shfuqizimin e një vendimi të agjencisë së Dibrës për tokat në Mat, aty ku lindi paraardhësi i tij Ahmet Zogu, mbreti i cili u largua nga Shqipëria për në Greqi në muajin prill të 1939-ës, në kohën kur vendi ynë u pushtua nga Italia fashiste.
Në një padi thuhet se “familja mbretërore e Princ Leka II nisën procedurat ligjore për njohjen, kthimin dhe kompensimin e pronave”.
Ato që kërkohen janë sipërfaqe me toka e që aktualisht rezultojnë se i përkasin shtetit shqiptar në fshatrat Zenisht, Rukaj, Rremull, Urakë e në qytetin e Burrelit.
Duke skicuar kufijtë për secilën nga parcelat në zonat e mësipërme, paditësi thotë se Zyra Rajonale e Kthimit dhe Kompensimit të Pronave Dibër, nuk e ka njohur si subjekt të shpronësuar. Por, paditësi Leka Zogu II i vë në dukje gjykatës se ai është trashëgimtar ligjor i radhës së parë i të ndjerit Leka Zogu I e Suzanës, ndaj dhe njohja e kompensimi i tyre duhet t’i kalojë gjyqësisht.
Nuk bëhet fjalë vetëm për toka bujqësore, por edhe për pyje e troje në katër fshatra e po ashtu në qytetin Burrelit e që si njësi administrative i përkasin Matit.
Në vitin 1945 kur në pushtet erdhën komunistët, Komiteti Ekzekutiv urdhëroi konfiskimin e pasurive të Ahmet Zogut e midis tyre edhe tokat në pronësi të tij kaluan në përdorim nga shteti shqiptar. Më herët, Princ Leka II fitoi në Gjykatën e Lartë një tjetër pronë të gjyshit, pikërisht vilën mbretërore të Shirokës, në Shkodër.
