Vezullimet dhe shpërthimet e papritura ndezën natën në Isfahan, provinca në Iranin qendror, e cila pret një qendër të madhe bërthamore, një bazë ajrore dhe objekte të tjera ushtarake.
Sipas asaj që tre zyrtarë iranianë i thanë gazetës “New York Times”, baza ajrore, e cila prej kohësh ka pritur flotën iraniane të F-14, “Tomcat”, super-avionët luftarakë të prodhuar nga Amerika, të blera para Revolucionit Islamik të vitit 1979, u sulmua.
Por nga Teherani e minimizojnë sulmin. Sipas mediave iraniane, shpërthimi ishte “rezultat i aktivizimit të sistemit të mbrojtjes ajrore”. Burime ushtarake të cituara nga agjencia e lajmeve “Fars” raportojnë se “sistemet e mbrojtjes ajrore janë aktivizuar” dhe kanë rrëzuar të paktën tre dronë kamikazë. Ushtria izraelite dhe Pentagoni deri më tani kanë refuzuar të komentojnë.
Agjencia e lajmeve “Pasdaran Tasnim” publikoi një video të një prej gazetarëve të saj, i cili tha se ishte në zonën juglindore të Zerdenjan në Isfahan, pranë “malit të tij të energjisë bërthamore”.
Pamjet treguan dy pozicione të ndryshme të armëve kundërajrore dhe detajet e videos përputheshin me tiparet e njohura të vendit të konvertimit të uraniumit iranian në Isfahan.
“Isfahani është qendra e programit bërthamor të Iranit për sa i përket trajnimit, kërkimit dhe zhvillimit të aftësisë bërthamore të Iranit, – sqaroi ish-zëvendës Sekretari amerikan i Shtetit, Mark Kimmitt, – frika më e madhe që kanë izraelitët nuk është vazhdimi i raketave sot, por aftësitë bërthamore nesër”, tha ai për BBC, duke shpjeguar rëndësinë e Isfahanit dhe pse Izraeli mund ta ketë zgjedhur atë si vendin e një sulmi.
Fabrika e Isfahanit operon tre reaktorë të vegjël kërkimor të furnizuar nga Kina, si dhe merret me prodhimin e karburantit dhe aktivitete të tjera për programin bërthamor civil të Iranit.
Isfahani është gjithashtu siti i vendeve të lidhura me programin bërthamor të Iranit, duke përfshirë vendndodhjen nëntokësore të pasurimit të Natanzit, i cili ka qenë vazhdimisht në shënjestër të sulmeve të dyshuara sabotuese izraelite. Televizioni shtetëror i përshkroi të gjitha vendet në zonë si “plotësisht të sigurta”.
Programi bërthamor i Iranit u rrit shpejt për të prodhuar uranium të pasuruar në nivele gati bërthamore pas rënies së marrëveshjes atomike me fuqitë botërore pasi, presidenti i atëhershëm Donald Trump tërhoqi Amerikën nga marrëveshja në vitin 2018.
Ndërsa Irani këmbëngul se programi i tij është për qëllime paqësore, vendet perëndimore dhe Agjencia Ndërkombëtare e Energjisë Atomike, thonë se Teherani drejtoi një program sekret të armëve ushtarake deri në vitin 2003.
IAEA ka paralajmëruar se Irani tani ka mjaft uranium të pasuruar për të ndërtuar disa armë bërthamore nëse vendos ta bëjë këtë.
