Armëmbajtje pa leje e moskallëzim krimi, dy të arresuar në lagjen Valas të Cërrikut, në cilësinë e provës materiale sekuestrohen një kallshnikov dhe municion luftarak. Në pranga ranë dy shtetas nga Berati, pas informacioneve të siguruara nga inteligjenca informative se qarkullonin me armë zjarri në makinë. Ata u kapën në kuadër të operacionit policor të koduar “Covered”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
Njoftimi zyrtar:
Kishte fshehur një armë zjarri kallashnikov dhe municion luftarak, në bagazhin e automjetit që drejtonte, arrestohet në flagrancë 37-vjeçari.
Vihet në pranga edhe pasagjeri në automjet, për moskallëzim krimi.
Sekuestrohen arma e zjarrit kallashnikov dhe municioni luftarak.
Specialistët e Seksionit për Hetimin e Narkotikëve, në bashkëpunim me shërbimet e Forcës Operacionale të DVP Elbasan, në vijim të punës për goditjen e paligjshmërisë në fushën e armëmbajtjes pa leje, bazuar edhe në informacionet e siguruara nga inteligjenca informative për dy shtetas që qarkullonin me armë zjarri, kanë organizuar operacionin policor të koduar “Covered”.
Si rezultat i këtij operacioni, në lagjen “Valas”, Cërrik, në bashkëpunim me shërbimet e Komisariatit të Policisë Elbasan, janë kapur në flagrancë dhe janë arrestuar shtetasit:
-A.Zh., 37 vjeç, banues në Berat, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
-A.K., 32 vjeç, banues në Berat, për veprën penale “Moskallëzimi i krimit”.
Gjatë kontrollit në automjetin me drejtues shtetasin A.Zh. dhe pasagjer shtetasin A.K., shërbimet e Policisë gjetën një armë zjarri kallashnikov dhe një sasi municioni luftarak, të cilat u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
