Ngjyra e pjatës mund të ndikojë në sasinë e ushqimit që do të hani. Studimet tregojnë se njerëzit priren të hanë më pak nëse ka më shumë kontrast ngjyrash midis pjatës dhe ushqimit. Nëse hani ushqim të lehtë nga një pjatë e errët, ndoshta do të hani më pak. Arsyeja është se pjesa juaj e ushqimit duket më e madhe sepse bie në sy në një sfond më të errët. Në një pjatë me ngjyrë të çelur, ajo thjesht shkrihet dhe ju e teproni me ushqim, kjo sipas hulumtimit.
Ngjyrat e ndezura si e verdha, portokallia dhe e kuqja nxisin më së shumti oreksin. Këto ngjyra, veçanërisht e kuqja, rrisin presionin e gjakut dhe rrahjet e zemrës, gjë që na bën të ndihemi më të uritur. Megjithatë, gri, e zeza, kafe dhe vjollcë konsiderohen zgjedhje të mira për ‘shtypjen’ e oreksit. Të kesh ushqim në pjata të këtyre ngjyrave zvogëlon shanset për të ngrënë tepër. Ndërkaq, shkenca sugjeron se ngrënia nga një pjatë blu e errët mund t’ju ndihmojë të kontrolloni më mirë madhësinë e porcionit tuaj.
Edhe forma luan një rol të rëndësishëm kur bëhet fjalë për humbjen e peshës. Është më mirë të hani ose pini nga një gotë ose enë e gjatë, e ngushtë sesa nga një pjatë e gjerë ose nga ndonjë gotë e sheshtë. Të dyja mund të mbajnë të njëjtën sasi lëngjesh ose ushqimi, por studimi tregon se njerëzit ndihen sikur kanë më shumë kur përdorin versionin e gjatë dhe të ngushtë.
