Dy të moshuar u gjetën të pajetë, me shenja dhune në trup, dyshohet për krim në familje. Për momentin, nuk ka shumë informacione lidhur me krimin makabër të ndodhur në fshatin Bodrishtë të Dropullit. Kosta e Kleoniqi Ilia, 84 dhe 88-vjeçe humbën jetën nga dhuna barbare në banesën e tyre. Policia në vendngjarje nisi hetimet për zbardhjen e rrethanave.
Fillimisht u mendua për një grabitje, por hetuesit nuk kanë gjetur asnjë element që të mbështesë këtë variant, ndaj dhe u përjashtua pista e grabitjes me dhunë. Dera e jashtme e banesës nuk ka pasur dëmtime dhe as dritaret nuk kanë pasur shenja që evidentojnë se është fjala për një grabitje e më shumë dyshohet për krim në familje.
Njoftimi i policisë:
Rreth orës 08:00, janë gjetur nga fqinjët, të pajetë, në banesën e tyre në fshatin Bodrisht, shtetasit K. I., 84 vjeç dhe K. I., 88 vjeçe (bashkëshortë). Nga këqyrjet paraprake të trupave të 2 shtetasve, janë konstatuar shenja dhune, dyshohet të shkaktuara me mjete të forta rrethanore.
Gjithashtu, nga këqyrja paraprake e vendit të ngjarjes, nuk janë konstatuar thyerje të dyerve apo dritareve, si dhe në brendësi të banesës nuk janë konstatuar çrregullime të orendive.
Menjëherë pas njoftimit, shërbimet e Policisë kanë shkuar në vendngjarje dhe së bashku me grupin e posaçëm hetimor të ngritur për këtë rast, në drejtimin e Prokurorisë, po vijojnë hetimet intensive për sqarimin e rrethanave të ngjarjes.
