Një çift britanik që ka jetuar për tetë vjet në Australi do të dëbohet sepse janë shumë të moshuar. Glenn Tunnicliff, 57 vjeç dhe bashkëshortja e tij Sheena, 50 vjeç, duhet të largohen brenda shtatë javësh pasi nuk kanë arritur të marrin qëndrim të përhershëm për shkak të ndryshimeve të vizave.
Ata u zhvendosën nga East Sussex në Perth me dy vajzat e tyre Tamzin dhe Molly, të cilat tani janë 21 dhe 18 vjeç, raportojnë mediat e huaja. Pavarësisht se secili anëtar i familjes ka një punë, Glenn dhe Sheena-s iu thanë të largoheshin deri më 4 gusht, sepse kufiri i moshës për të fituar qëndrimin e përhershëm (PR) – rruga drejt shtetësisë – është 45 vjeç. Sheena shprehet:
Ne nuk duam të kthehemi në Britani të Madhe, ne kemi krijuar një jetë këtu. Tani kemi kaluar atë shifër magjike prej 45, nuk ka asnjë rrugë drejt qëndrimit të përhershëm për ne. Australia na klasifikon si shumë të moshuar, por ne jemi ata që kemi përvojë dhe njohuri.
Familja ka marrë vizë pune sepse aftësitë e Glenn për suvatimin janë shumë të kërkuara në të gjithë Australinë. Kompania që e sponsorizon atë është gati të mbyllet, që do të thotë se familja nuk mund të marrë një vizë të përhershme.
Sheena tha se çifti ka shpenzuar 80,000 dollarë për viza gjatë viteve, ndërsa nuk ka marrë gjithmonë këshillat më të mira nga agjentët. Avokatja Joanne Kinslor shpjegoi arsyetimin që qëndron pas PR në Australi dhe tha:
Kufiri i moshës në fuqi për shumicën dërrmuese të emigrantëve të aftë lind nga një shqetësim i politikës se jeta e punës dhe kontributet ekonomike të emigrantëve më të vjetër të kualifikuar ka të ngjarë të jenë më të vogla se ajo e emigrantëve të rinj.
Por kjo u kritikua nga agjenti i migracionit Mateja Rautner, i cili tha se qeveria australiane po promovonte në mënyrë aktive Australinë si destinacion për migrantët e aftë, ndërsa ‘kufizonte opsionet’ për ata mbi 45 vjeç.
