Erzeni, “mace e zesë” për Tiranën në këtë sezon. Skuadra shijakase u mori pikën e shtatë bardhebluve në këtë sezon.
Në “Arena Kombëtare”, për javën e 23-të të Superiores (faza e tretë) ndeshja e mbyll në barazim 1-1.
Në dy fazat e para Erzeni kishte marrë pikë të plota, duke i fituar të dyja ndeshjet 1-0.
Një pikë me shumë vlerë për Erzenin për mbijetesën, dy pikë të humbura për Tiranën që tashmë rrezikon edhe play off-in, pasi Dinamo, e cila fitoi një ditë më parë me Partizanin, renditet e pesta me vetëm tri pikë më pak.
Tirana dominoi sa i përket lojës, por e kishte të vështirë të konkretizonte rastet e krijuara.
Befasia ndodhi në minutën e 75-të, kur Zeka realizoi një gol fantastik me roveshatë, duke shfrytëzuar pasigurinë e portierit Abdullahu.
Reagimi i Tiranës ishte i shpejtë, me Abazajn që shtyu me kokë drejt rrjetës një krosim të Hoxhallarit. Emocione dhe drithërima në minutat e fundit, por rezultati nuk ndryshoi.
Vjen humbja e radhës për Kukësin, që në këtë raund u mposht nga Skënderbeu në Korçë, ku vendosi goli i Rashicës. Kukësi mbetet në fundin e tabelës, ndërsa Skënderbeu në të shtatin, me 28 pikë.
