“A Live Night” erdhi këtë të diel me një nga artistet padyshim më të dashura të publikut. Jo vetëm për muzikën dhe artin e mirë që sjell, por Kejsi Tola ka ruajtur gjithmonë një imazh shumë të pëlqyer nga audienca prej vitesh. Këngëtaren e kemi parë shumë rrallë në dalje televizive apo intervista, ndaj kjo e mbrëmjes së sotme ka rrëfime shumë speciale dhe të padëgjuara më parë nga artistja.
Sa e vështirë ka qenë për një vajzë të re pa mbështetje që t’ja dilte dhe të arrinte të krijonte karrierën e saj të suksesshme në fushën e muzikës?
Çdo vajzë ka shumë mbështetje sepse ka mbi të gjitha veten e saj me vete. Nuk mendoj që duhet të ketë dikë në krahë por mendoj që një vajzë patjetër mund t’ia dalë vetë, me hapa të vogla të sigurta me shumë ulje-ngritje ama mjafton që të mos humbasë veten e saj në të gjithë këtë rrugë. Momentin që i qëndrojmë besnik vetes tonë në atë moment kemi fituar çdo gjë. Kam pasur pasiguri vetëm shumë pak momente kur kam qenë në adoleshencë sepse ndoshta kam qenë e papjekur, nuk kuptoja se çfarë më duhej dhe doja. Mendoj që njeriu kur rritet kupton veten e tij dhe e di se çfarë do dhe se cila është e mirë për të pavarësisht që këtë nuk e ndan dot asnjëherë se kush është më e mira apo çfarë është më e mira për ty. Kam kuptuar veten time dhe mendoj që në momentin që ne arrijmë të kuptojmë veten tonë pastaj pasiguritë mendoj që thjesht menaxhohen sepse do ti kemi aty gjithmonë.
