Avionët luftarakë të Polonisë dhe të aleatëve u aktivizuan sot, pasi Rusia kreu sulme me raketa në Ukrainë.
Avionët polakë dhe të aleatëve po fluturojnë në hapësirën polake, gjë që mund të rezultojë në rritjen e niveleve të zhurmës, sidomos në pjesën jugperëndimore të shtetit.
Pjesa juglindore e Polonisë është në kufi me Ukrainën që më herët njoftoi se gjatë natës u përball me sulmet ruse me raketa dhe dronë që kanë shënjestruar infrastrukturën energjetike të shtetit. Aktivizimi i forcave ajrore polake vjen disa ditë pasi presidenti rus, Vladimir Putin, tha se nuk do të sulmojë asnjë shtet të NATO-s, as Poloninë, as shtetet e Baltikut dhe as Republikën Çeke.
Por, shefi i Kremlinit paralajmëroi se nëse avionët luftarakë F-16 të prodhimit amerikan përdoren në Ukrainë, atëherë ato do të rrëzohen nga ushtria ruse.
Sigurisht, nëse këta avionë do të përdoren nga bazat ajrore nga një shtet i tretë, për ne do të bëhen objektiva legjitime.
Dita e 765-të e luftës në Ukrainë. Gjatë natës, ushtria ruse nisi një sulm të fuqishëm raketor kundër objekteve energjetike të vendit fqinj ku vijojnë luftime të ashpra prej muajit shkurt të vitit 2022. Informacionin e bëri të ditur komandanti i Forcave Ajrore, Mykola Oleschuk, duke theksuar se mbrojtja ka rrëzuar 84 nga 99 objektiva.
Trupat e Kremlinit sulmuan me 60 dronë, tre raketa aerobalistike X-47M2 Kinzhal, dy raketa balistike Iskander-M, 9 raketa X, 59 avionë të drejtuar, 4 raketa lundrimi Iskander-K e po ashtu 21 raketa lundrimi X-101-X-555. Ministria ukrainase e Energjisë njoftoi se “janë dëmtuar termocentralet dhe hidrocentralet në rajonet qendrore e perëndimore”.
Sipas vlerësimeve të institutit amerikan ISW (Instituti për Studimin e Luftës), forcat ruse kanë pushtuar 505 kilometra katrorë të territorit ukrainas që kur nisën operacionet sulmuese në tetor të vitit të kaluar. Dhe ata kanë fituar pothuajse 100 kilometra katrorë më shumë mes 1 janarit dhe 28 marsit 2024, krahasuar me tre muajt e fundit të 2023-shit.
Mundësitë për të shfrytëzuar dobësitë e Ukrainës do të zgjerohen ndërsa vazhdon mungesa e armëve…, shkruan ISW në faqen e tij të internetit.
Sipas Turqisë, sulmi i marrë përsipër nga ISIS-i në një sallë koncertesh të Bashkisë Crocus në periferi të Moskës e ku më 22 mars humbën jetën të paktën 143 persona, “nuk do të ishte i mundur pa mbështetjen e shërbimeve sekrete të huaja”. Kështu ka deklaruar Omer Çelik, zëdhënës i partisë turke në pushtet AKP.
Kjo nuk mund të ndodhë pa mbështetjen e inteligjencës së ndonjë vendi. E vërteta është se ISIS-i nuk është në gjendje të kryejë vetë një organizim të atyre përmasave. Veprime të tilla e kanë një sponsor.
“Tani pothuajse nuk ka më fusha ku Rusia dhe Perëndimi mund të kenë një lloj bashkëpunimi dhe kontakte reale”. Kështu tha ministri i Jashtëm rus Sergei Lavrov. Në një intervistë për gazetën Izvestia, në përgjigje të një pyetjeje mbi këtë çështje, Lavrov u shpreh:
Nuk ka pothuajse asnjë. Marrëdhëniet aktuale mes Rusisë dhe Perëndimit kanë për qëllim vetëm ruajtjen e funksionimit të ambasadave.
