Vala e infektimeve nga varianti BA5 ka filluar rënien. Instituti i Shëndetit Publik konstaton se piku i përhapjes së këtij mutacioni, tashmë ka kaluar. Ditët e para të gushtit po shënojnë ulje të pozitivitetit nga Covid-19 në pjesën më të madhe të vendit.
Edhe shifrat e të sëmurëve aktivë në të gjithë vendin kanë filluar rënien. Tirana vijon të jetë qarku me infektimet më të larta edhe nga varinati BA5, ndjekur nga Fieri dhe bashkitë bregdetare. Epidemiologët e Institutit të Shëndetit Publik theksojnë rëndësinë e vaksinimit për t’i paraprirë një valë tjetër në vjeshtë dhe dimër.
Në këtë valë infektimesh, pozitiviteti më i lartë nga Covid-19 është vënë re tek të rinjtë dhe te personat mbi 60 vjeç.
BA5 është një mutacion shumë ngjitës, por më i lehtë se variantet e deritanishme të Covid-19, ndonëse edhe në këtë valë nuk kanë munguar rastet e rënda dhe humbjet e jetës prej tij.
Në Shqipëri në 24 orë u shënuan 2 viktima nga koronavirusi, ndërsa numri i të infektuarve sipas Ministrisë së Shëndetësisë ka shkuar në 1207 qytetarë të infektuar në 2468 testime.
Ministria e Shëndetësisë njofton se aktualisht në spitalin COVID3 po marrin trajtim 28 pacientë, ndërsa në të gjithë vendin janë 7721 qytetarë aktivë me Covid19.
Deklarata e Ministrisë së Shëndetësisë:
Nisur nga rritja e numrit të qytetarëve të prekur nga Covid19, Ministria e Shëndetësisë i bën sërish thirrje qytetarëve të mos neglizhojnë vaksinimin anticovid, posaçërisht në këtë periudhë të rritjes së kontakteve, për shkak të lëvizjeve përgjatë sezonit veror.
Çdo person mbi 12 vjeç, mund të vaksinohet në qendrat shëndetësore në të gjithë vendin. Gjithashtu MSHMS apelon të gjithë qytetarët e vaksinuar, që të drejtohen në qendrat shëndetësore, për t’u vaksinuar me dozën përforcuese.
Vaksinat antiCOVID reduktojnë mundësinë e infektimit dhe shmangin në shkallë të lartë hospitalizimet dhe fatalitetet.
Nëse keni shenja të sëmundjes apo keni patur kontakt me një person të prekur nga Covid19, izolohuni menjëherë dhe kontaktoni mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127.
Ju informojmë për situatën në 24 orët e fundit, si vijon: Janë kryer 2468 testime, nga të cilat kanë rezultuar pozitivë me COVID19, 1207 qytetarë, në këto bashki:
413 në Tiranë, 74 në Durrës, 63 në Vlorë, 57 në Fier, 49 në Lushnje, 46 në Elbasan, nga 29 qytetarë në Shkodër, Kamëz, Sarandë, 27 në Korçë, nga 26 qytetarë në Gjirokastër, Pogradec, nga 23 qytetarë në Lezhë, Divjakë, Kuçovë, nga 19 qytetarë në Krujë, Kavajë, 15 në Malësi e Madhe, nga 14 qytetarë në Kurbin, Himarë, 12 në Tepelenë, nga 11 qytetarë në Mirditë, Shijak, Patos, nga 10 qytetarë në Tropojë, Dibër, 9 në Maliq, nga 8 qytetarë në Vorë, Mallakastër, Belsh, Gramsh, nga 7 qytetarë në Kolonjë, Berat, Skrapar, nga 6 qytetarë në Bulqizë, Delvinë, Dimal, Poliçan, nga 4 qytetarë në Vau i Dejës, Kukës, Selenicë, Peqin, nga 3 qytetarë në Pukë, Has, Përmet, nga 2 qytetarë në Fushë Arrëz, Mat, Roskovec, Libohovë, Cerrik, nga 1 qytetar në Rrogozhinë, Këlcyrë, Librazhd.
Janë 7,721 qytetarë aktivë me Covid19 në gjithë vendin.
Aktualisht në spitalin COVID3 po marrin trajtim 28 pacientë. Në 24 orët e fundit ka dy humbje jete me Sars-Cov2: një qytetare nga Kavaja 85 vjeçe, një qytetare nga Durrësi 86 vjeçe
Janë shëruar 1023 qytetarë gjatë 24 orëve të fundit, duke e çuar numrin e të shëruarve në 302,311 që nga fillimi i epidemisë.
Statistika (2 Gusht 2022)
Raste të reja ditore 1207
Të shëruar në 24 orë 1023
Të shtruar në spitale 28
Humbje jete në 24 orë 2
Testime ditore 2468
Testime totale 1,921,290
Raste pozitive 313,582
Raste të shëruara 302,311
Raste Aktive 7,721
Humbje jete 3,550
