Këngëtari legjendar Elton John pak javë më parë deklaroi se do t’i japë fund koncerteve ‘live’ dhe turneve muzikore pasi për shkak të komplikimeve shëndetësore nuk e ka më luksin të jetë kaq aktiv.
Gjatë koncerteve është traditë që në një nga këngët e tij një pjesë e fansave ngjiten në skenë, të ftuar nga vetë ai, për ta shoqëruar gjatë këngës.
E njejta gjë ka ndodhur edhe në një nga performancat e tij në Las Vegas ku një turmë e vogël fansash u ftuan nga Elton për ta shoqëruar në këndimin me piano, mirëpo kjo situatë mori një kthesë negative.
Një nga fansat po i qëndronte aq afër saqë i pengonte këndimin ndërsa disa të tjerë përpiqeshin të preknin idhullin e tyre pa pushim. I irrituar 70-vjeçari nisi të ofendojë fansat e tij dhe ndërpreu performancën për t’u larguar nga skena.
Pas një momenti të shkurtër pushimi ai u rikthye sërish dhe teksa ende po ofendonte fansat e tij ata u shoqëruan jashtë skenës ndërsa djaloshi i cili po e prekte gjatë gjithë kohës u përjashtua nga koncerti.
Kjo është hera e parë që Elton John ka reaguar në këtë mënyrë dhe në koncertet që i kanë mbetur me siguri askush nuk do të ftohet më në skenë.