“Raketat që vranë dy persona në Poloni, mund të mos jenë hedhur nga Rusia”. Kështu shprehet presidenti i Shteteve të Bashkuara të Amerikës, Joe Biden. Në Bali të Indonezisë ku mbahet samiti i G20-ës, Biden thirri edhe një takim urgjent për zhvillimet e fundit. I pyetur nëse është herët të thuhet se raketat që ranë në Poloni, u hodhën nga Rusia, deklaroi:
Ka informacion paraprak që e kundërshton këtë. Nuk dua ta them këtë derisa ta hetojmë plotësisht, por nuk ka gjasa në linjën e trajektores që të jenë hedhur nga Rusia. Por, do të shohim.
Shpërthimi i së martës në një fshat polak, pranë kufirit me Ukrainën, ndodhi pasi Rusia nisi një valë sulmesh raketore kundër infrastrukturës energjetike të Ukrainës. Ministria polake e Punëve të Jashtme saktësoi se “raketat ranë në Përzevodov”, rreth 6 kilometra nga kufiri me Ukrainën.
Rusia mohoi se është përgjegjëse për shpërthimin, ndonëse zyrtarët polakë thanë se raketat ishin prodhim rus. Polonia është vend anëtar i NATO-s e një sulm rus në territorin e saj do të rrezikonte zgjerimin e konfliktit përtej Ukrainës, pasi NATO është e përkushtuar ndaj mbrojtjes kolektive. Neni 5 i Traktatit të Aleancës thotë se sulmi ndaj një vendi anëtar, është sulm ndaj të gjithëve.
Biden konfirmoi se “Shtetet e Bashkuara dhe vendet e tjera të NATO-s do të bëjnë hetime të plota përpara se të veprojnë”.
Presidenti i Ukrainës, Volodymyr Zelensky, tha se “raketat ruse goditën Poloninë”, duke përshkallëzuar në mënyrë të konsiderueshme konfliktin. Megjithatë, nuk paraqiti ndonjë provë për përfshirjen e Rusisë. Pas një telefonate me homologun polak, Andrzej Duda, në Twitter shkroi:
E gjithë Europa e bota duhet të mbrohen plotësisht nga Rusia terroriste!
Dy diplomatë europianë thanë se Polonia kërkoi një takim të NATO-s, që pritet të mbahet sot, në bazë të Nenit 4 të Traktatit të NATO-s për konsultime mes aleatëve. Gjithashtu, Polonia rriti gatishmërinë e disa njësive ushtarake, siç njoftoi kryeministri Mateusz Morawiecki. Morawiecki u bëri thirrje polakëve të qëndrojnë të qetë, ndërsa presidenti Duda tha se nuk ka prova konkrete që tregojnë se kush i hodhi raketat.
Më herët, agjencia e lajmeve Associated Press, citoi një zyrtar të lartë të inteligjencës amerikane, sipas të cilit “shpërthimi në Poloni ndodhi si pasojë e raketave ruse që kaluan në këtë vend”. Por, në Uashington, Pentagoni, Shtëpia e Bardhë e Departamenti i Shtetit thanë se nuk mund t’i vërtetojnë këto raportime e se janë duke punuar me qeverinë polake për të mbledhur më shumë informacione.
Ministria e Mbrojtjes e Rusisë mohoi se raketat ruse goditën territorin polak.
Të tilla lajme janë një provokim i qëllimshëm, që synon përshkallëzimin e situatës.