Arkeologët në Marok kanë zbuluar më shumë se 80 gjurmë njerëzore që datojnë rreth 100,000 vjet më parë dhe që besohet të jenë më të vjetrat në Afrikën e Veriut. Gjurmët, ndoshta të lëna nga pesë homo sapiens, duke përfshirë fëmijë, u zbuluan në bregun e Larache, një qytet 90 kilometra në jug të Tangierit, nga arkeologë nga Maroku, Spanja, Franca dhe Gjermania.
“Ky grup (i homo sapiens) po kalonte drejt detit, ndoshta në kërkim të ushqimit dhe butakëve. Ata ishin ndoshta peshkatarë ose grumbullues”,-tha Anass Sedrati, kurator në zonën arkeologjike të Lixus Larache. Studiuesit, studimi i të cilëve u botua në revistën shkencore Nature në janar, thanë se gjurmët ishin disa nga gjurmët njerëzore më të ruajtura në botë dhe më të vjetrat në Afrikën e Veriut dhe Mesdheun jugor.
“Ky zbulim u bë gjatë një misioni në terren në korrik 2022, si pjesë e një projekti kërkimor shkencor mbi origjinën dhe dinamikën e gurëve të shpërndarë përgjatë vijës bregdetare,”-thanë studiuesit e udhëhequr nga Universiteti francez Bretagne Sud. Në vitin 2017, disa mbetje homo sapiens që datojnë 300,000 vjet u zbuluan në veriperëndim të Marokut, një zbulim që e shtyu origjinën e vlerësuar të specieve njerëzore me 100,000 vjet.
“Gjurmët e këmbëve në Larache ishin dëshmi e mëtejshme e rëndësisë së rajonit në historinë njerëzore”,-tha Anass Sedrati, duke vënë në dukje se ishin zbuluar edhe gjurmë kafshësh. “Ne duhet ta ruajmë këtë zonë të mrekullueshme të trashëgimisë, edhe nëse kërcënohet nga rritja e nivelit të detit dhe stuhitë. Gjurmë të tjera do të zbulohen me gërryerjen e sedimenteve. Do të ishte interesante atëherë të ndiqje këtë erozion dhe të zbuloje gjurmë të reja që do të jepnin më shumë detaje mbi homo sapiens që jetonin përgjatë këtij bregdeti”,-tha Mouncef Sedrati, kreu i projektit kërkimor.
