Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Aktualitet

Humbi motrën, deputeti Sinaj apel grave e vajzave: “Mos neglizhoni mamografinë!”

Deputeti socialist, Vullnet Sinaj iu bën thirrje të gjitha grave dhe vajzave, të mos neglizhojnë mamografinë. Mes dhimbjes për ndarjen nga jeta të motrës së tij, Sinaj apelon të mos lihet pas dore kontrolli mjekësor, që shpëton jetë.

Mesazhi i plotë i deputetit:

E shtrenjta motër, lamtumirë!

Tani jam ulur dhe përpiqem të rikthehem në çdo kujtim tëndin. Në memorien time ti je përherë e qeshur, edhe kur ishe e brengosur. Na ushqeje me forcë edhe kur vetë ishe e mërzitur. E gjithë jeta jote ishte një sakrificë e madhe për familjen tënde dhe për ne.

Sot zemra jote u zbras nga vuajtjet dhe tonat u mbushën me trishtim. Një urtësi e popullit thotë: “Motra për vëllain lë kokën, vëllai për motrën çon në peshë botën”.  Por neve bota nuk na detyrohet asgjë dhe ky ishte fati yt i shkruar me dhimbje.

Me këtë rast hidhërimi për mua dhe familjen tonë, dëshiroj t’ju bëj thirrje të gjitha motrave dhe nënave të mos neglizhojnë kontrollin mjekësor dhe mamografinë.  Ato shpëtojnë jetët tuaja dhe kursejnë dhimbjen tonë, që nuk njeh dot ngushëllim.

U prehsh në paqe, Vali e dashur!