Sekretari amerikan i Shtetit, Antony Blinken vlerëson se ekziston “një mundësi e jashtëzakonshme” në muajt e ardhshëm që Izraeli të normalizojë lidhjet me fqinjët arabë dhe po ashtu theksoi nevojën për krijimin e një shteti palestinez.
Diplomati i lartë i Uashingtonit vuri në dukje se po bëhen përpjekje reale nga vendet arabe për të rigjallëruar Autoritetin Palestinez, në mënyrë që të bëhet më efektiv në përfaqësimin e palestinezëve. Duke folur nga punimet e Konferencës së Sigurisë në Mynih të Gjermanisë, Blinken u shpreh:
Pothuajse çdo vend arab tani dëshiron që të integrojë Izraelin në rajon. Kjo për të normalizuar marrëdhëniet e për të ofruar angazhime dhe garanci, në mënyrë që Izraeli të ndjehet më i sigurt. Dhe gjithashtu, unë mendoj se është më urgjente se kurrë që ne të vazhdojmë përpekjet drejt një shteti palestinez që garanton edhe sigurinë e Izraelit.
Administrata e presidentit Biden është angazhuar për të siguruar një marrëveshje për normalizimin e lidhjeve midis Arabisë Saudite dhe Izraelit.
Arabia Saudite dhe vendet e tjera arabe kërkojnë krijimin e një shteti palestinez si pjesë të marrëveshjes. Uashingtoni po punon gjithashtu për të arritur një marrëveshje për të siguruar lirimin e pengjeve izraelitë të rrëmbyer nga Hamasi më 7 tetor.
Marrëveshja për pengjet dhe një pauzë humanitare shihen si thelbësore për të ndihmuar në avancimin e bisedimeve për një marrëveshje normalizimi midis Arabisë Saudite dhe Izraelit.
Sot është dita e 135-të e luftës në Lindjen e Mesme mes Izraelit dhe Hamasit. Mbi 40 persona, përfshirë fëmijë kanë humbur jetën në sulmet e reja izraelite në Gazën qendrore. Raportohen edhe të paktën 50 të plagosur. Kryeministri izraelit, Benjamin Netanyahu bëri të qartë se “një operacion ushtarak në veri” të Rripit është i nevojshëm dhe paralajmëron se trupat e shtetit hebraik do të hyjnë në Rafah pavarësisht nga një marrëveshje e mundshme për lirimin e pengjeve.
Trupat izraelite do të hyjnë në Rafah, pavarësisht nga çdo marrëveshje me Hamasin për lirimin e pengjeve. Edhe nëse e marrim do të hyjmë në Rafah. Ata që duan të na pengojnë të veprojmë, në thelb na thonë ta humbim luftën. Këtë i thashë edhe presidentit amerikan Joe Biden.
