Në Gjykatën e Posaçme të Apelit për Korrupsionin dhe Krimin e Organizuar, u zhvillua seanca për ish-ministrin Saimir Tahiri dhe ish drejtorin e policisë së Vlorës Jaeld Çela. SPAK i qëndron të njëjtit qëndrim si në shkallën e parë dhe kërkon 12 vite burg për Tahirin e Celën.
Duke qenë se Tahiri dhe Çela kanë përfituar gjykim të shkurtuar, atyre i ulet 1/3 e dënimit.
Sipas gazetares Anila Hoxha që ndoqi nga afer seancën, në fjalën e tij Jaeld Çela tha: “Në të gjithë dosjen janë katër episode. Unë në detyrë kam ardhur më 5 shtator 2014 dhe më 28 prill 2017 u largova nga detyra.
Nga të gjitha këto episode akuzohem për dy raste, për Treblovën që ndoqa operacionin. Nuk e kuptoj ku e kam shpërdoruar detyrën. Gjykata thotë se gjatë kohës që isha drejtor i policisë së Vlorës, kultivimi në masë më bën përgjegjës, por gjatë asaj kohe s’ka asnjë rast trafikimi. Më akuzojnë për peshkarexhën Fatima dhe hetimi u krye në Itali. Shteti shqiptar zero dijeni, zero informacion nga pala shqiptare.”
Ndërsa ish ministri i Brendshëm Saimir Tahiri kërkoi pafajësi.
“Dua t’ju kërkoj me shumë përulje që të bëni atë që duket nga provat dhe faktet se është më e drejtë. Kërkoj të më shpallni të pafajshëm.”
Dy ish zyrtarët e lartë Tahiri e Çela, akuzohen për shpërdorim detyre si të lidhur me grupin e Habilajve.
