Spanja, Irlanda dhe Norvegjia vendosën ta njohin Palestinën si shtet të pavarur. Por, ky vendim historik nxiti kundërshtim të ashpër nga Izraeli, sikurse dhe gëzim nga palestinezët. Shteti hebraik i tërhoqi menjëherë ambasadorët nga Norvegjia e Irlanda.
Norvegjia nuk është anëtare e Bashkimit Europian, por ndjek politikat e saj dhe ka qenë mbështetëse e zjarrtë e zgjidhjes me dy shtete mes Izraelit e palestinezëve. Kryeministri Jonas Gahr Store tha se “nuk mund të ketë paqe në Lindjen e Mesme, nëse nuk ka njohje”.
Palestina ka të drejtën thelbësore për të qenë shtet i pavarur. Terrori është kryer nga Hamasi e nga grupet militante, të cilat nuk janë përkrahëse të zgjidhjes me dy shtete, si dhe nga shteti i Izraelit.
Store tregoi se shteti skandinav do ta njohë zyrtarisht atë palestinez nga 28 maji.
Duke e njohur Palestinën si shtet, Norvegjia mbështet planin për paqe arabe.
Në javët e fundit, disa vende të Bashkimit Europian lanë të kuptohet se kanë ndër mend që ta njohin Palestinën, duke argumentuar se zgjidhja me dy shtete është thelbësore për paqe afatgjatë në rajonin e trazuar nga luftimet. Lufta më e fundit Izrael-Hamas zhvillohet prej 7 tetorit 2023 kur militantë të Hamasit goditën dhe hynë në jug të territorit izraelit duke vrarë 1 mijë e 200 persona e rrëmbyer rreth 250 të tjerë. Hamasi është grup radikal palestinez i shpallur “terrorist” nga Shtetet e Bashkuara të Amerikës e nga Bashkimi Europian.
Vendimi i tre vendeve bëhet i ditur në një kohë kur forcat izraelite po kryejnë sulme në pjesët veriore dhe jugore të Rripit të Gazës, duke shkaktuar zhvendosjen e qindra mijëra njerëzve e kufizuar dukshëm futjen e ndihmave në enklavën palestineze.
Norvegjia po e njeh Palestinën si shtet më shumë se 30 vjet pas marrëveshjes së parë të Oslos, e nënshkruar më 1993-shin. Që prej atëherë, “palestinezët kanë bërë hapa të rëndësishëm drejt zgjidhjes me dy shtete”, deklaroi qeveria norvegjeze.
Banka Botërore theksoi se Palestina i ka përmbushur kriteret kyçe për të funksionuar si shtet më 2011-ën e se janë ndërtuar institucione kombëtare, për t’i ofruar shërbime të rëndësishme popullit.
Ndërkohë, kryeministri irlandez, Simon Harris u shpreh se “kjo është një ditë historike dhe e rëndësishme për Irlandën e Palestinën”.
Sa i përket Spanjës, kryeministri Pedro Sanchez, tha se vendi i tij do ta njohë Palestinën si shtet më 28 maj. Sanchez, lider socialist i Spanjës prej vitit 2018 e dha lajmin e pritur, sot gjatë një fjalimi në Parlament. Disa muaj, Sanchez i ka kaluar në vendet europiane e të Lindjes së Mesme, për të fituar mbështetje për njohjen e Palestinës, si dhe për një armëpushim të mundshëm në Gaza.
