Shpërndanin kokainë në sasi të mëdha, pesë të prangosur në Tiranë, në kuadër të operacionit policor të koduar “Kodra e Diellit 2”. Ata u lokalizuan në rrugën “Rrapo Hekali” dhe brenda një çante që iu sekuestrua iu gjetën dy pako me mbi 2 kg kokainë. Droga shitej për rreth 30 mijë euro kilogrami në vende të ndryshme në kryeqytet. Po ashtu iu sekuestruan tre automjete, si dhe katër aparate celulare.
Njoftimi i Policisë:
Specialistët e Seksionit të Hetimit të Narkotikëve në DVP Tiranë, në vijim të punës për goditjen e aktivitetit kriminal në fushën e shpërndarjes së lëndëve narkotike, pas një pune të mirëfilltë hetimore, bazuar dhe në informacionet e siguruara nga inteligjenca informative, organizuan dhe finalizuan operacionin policor të koduar “Kodra e Diellit 2”.
Në kuadër të këtij operacioni u bë arrestimi në flagrancë i shtetasve:
Donald Muhamuçi, 31 vjeç, Ermal Lamaj, 39 vjeç, të dy banues në Tiranë, Kostaq Murtaj, 29 vjeç, Olsi Mylka, 34 vjeç, Shemsi Proda, 30 vjeç, të tre banues në Sarandë.
Në rrugën “Rrapo Hekali”, shërbimet e Policisë kanë lokalizuar shtetasit e lartpërmendur dhe një çantë brenda të cilës dyshohej se kishte lëndë narkotike të llojit kokainë. Gjatë kontrollit të çantës janë gjetur 2 pako me lëndë të dyshuar narkotike të llojit kokainë, me një peshë totale 2 kg e 300 gr.
Nga verifikimet e kryera ka rezultuar se këta shtetas në bashkëpunim me njëri-tjetrin, siguronin lëndë të dyshuar narkotike të llojit kokainë në sasi të mëdha, dhe më pas e shisnin atë rreth 30 mijë euro kg, në vende të ndryshme në Tiranë.
Në cilësinë e provës materiale u sekuestruan rreth 2 kg e 300 gr lëndë e dyshuar narkotike kokainë, 3 automjete si dhe 4 aparate celulare.
Vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
