‘A Live Night’ erdhi edhe këtë të shtunë me një nga artistët padyshim më të dashur të publikut. Jo vetëm për muzikën dhe artin e mirë që sjell, por Alban Skënderaj ka ruajtur gjithmonë një imazh shumë të pëlqyer nga audienca të të gjitha moshave prej vitesh. Këngëtarin dhe producentin e kemi parë shumë rrallë në dalje televizive apo intervista, ndaj kjo e ‘A Live Night’ ka rrëfime shumë speciale dhe të padëgjuara më parë nga artisti.
Albani, si kurrë më parë u rrëfye dhe për ndjesitë e tij shumë personale dhe na tregoi ‘anën tjetër të medaljes’ nga ‘perfeksioni që pasqyron bota e artit’.
Nuk është sekret që unë jam pak i tërhequr nga rrjetet sociale, nga ‘gossip’, nga intervistat e shumta po është një gjë që nuk e bëj për ndonjë synim të caktuar apo arrogancë jo e jo, por e vërteta është që jam pak introvert si natyrë dhe intervistat realisht më marrin shumë energji, sidomos për natyrën time. Kam përshtypjen që më naivët e shohin artistin si një njeri të realizuar, i cili është perfekt, është dhe pak faji i ne artistave që shfaqim vetëm pjesët e bukura, jo ndjesitë tona njerëzore. Nuk ka artist në botë që nuk ka ulje-ngritjet e tij. Unë jam munduar të jem real, sidomos në shfaqjet e mia. Perfeksioni nuk ekziston, lumturia vjen me grimca. Nuk ka artist, nuk ka të famshëm, nuk ka milioner në botë që është i lumtur në atë konceptin platonik. Lumturia nuk gjendet as te fama as te adhurimi. Si çdo njeri, kam momentet e mia të ankthit, të pasigurive dhe patjetër që të jesh artist ka shumë benefite, por ka dhe një çmim që duhet paguar. Asgjë nuk të jepet pa të marrë diçka.
