Në këto çaste dy liderët demokratë tashmë të shndërruar ndër rivalët më të ashpër nisin takime me anëtarësinë në bazë. Kështu Ish-Kryeministri Sali Berisha do të bisedojë me demokratët e Shkodrës në një takim të njoftuar për në 11:00 në “Pallatin e Sporteve”. Ndërkohë në të njëjtin orar edhe kryetari i Partisë Demokratike, Lulzim Basha do të jetë me mbështetësit në Fier, takimi i dytë ky në bazë pas atij në Dibër.
Kujtojmë se dje Lulzim Basha, pasi i përjashtoi mbështetësit e Berishës nga PD, njoftoi zëvendësimin e tyre ne komisionet parlamentare. Duke qenë se Enkelejd Alibeaj, vendoset kreu i grupit parlamentar të PD, ai largohet nga nënkryetar i Kuvendit dhe postin e tij e zë Alfred Rushaj. Përjashtimi i Albana Vokshit nga PD, ka bërë që vendin e saj si kryetare e Komisionit të Shëndetësisë ta zërë Grida Duma. Kryetare e Komisionit të Arsimit vendoset Flutura Açka, e cila zëvendëson Agron Gjekmarkajn. Nënkryetar i Komisionit të Ligjeve vendoset Dhurata Çupi, që zëvendëson Flamur Nokën.
Ndryshime janë bërë edhe në sekretariatet, ku Sekretariati për Buxhetin: Xhelal Mziu (sekretar), Sekretariati për Procedurat, Votimet dhe Etikën: Bledion Nallbati (anëtar), Sekretariati për Statusin e Deputetit: Dashnor Sula (sekretar), Sekretariati për Kërkimin Parlamentar, Bibliotekën dhe Botimet: Lindita Metaliaj (anëtar).
Gjatë mbledhjes së Këshillit Kombëtar, Lulzim Basha tha se vendimi për përjashtimin e Berishës dhe organizatorëve të dhunës ishte i vështirë, por i duhur. Kryedemokrati e cilësoi 8 janarin si “vijën e kuqe” ku u bë ndarja përfundimtare me nxitësit e dhunës.
Ndërkohë që pak orë para tij Sali Berisha e rriti stekën e akuzave ndaj ish-birit të tij politik. Akuza e radhës ka të bëjë me një prej bizneseve me fitimprurëse, atë të lojërave të fatit.
Nga Lezha ish-Kryeministri tha se Qeveria i mbylli në fillim të vitit 2019 pasi ia kaloi online ato një kompanie në Qipro, pronare e së cilës është me 80% të aksioneve bashkëshortja e kreut të opozitës, Aurela Basha. Partia Demokratike reagoi pas këtyre akuzave, duke i konsideruar gënjeshtra, ndërsa cilësojnë Berishën si ‘mashtrues kronik’.
