MacKenzie Scott ka dhuruar së fundmi mbi 500 milionë euro për organizatat jofitimprurëse të SHBA, më shumë se dyfishi i donacioneve të planifikuara më parë. Miliarderja njëkohësisht ish-bashkëshortja e Jeff Bezos njoftoi këtë javë se do t’u jepte paratë 361 grupeve të vogla, nga më shumë se 6,000 organizata që aplikuan për financim.
Ajo fillimisht kishte planifikuar të bënte 250 çmime prej një milion euro secili këtë vit. Scott ka dhënë 16.5 miliardë dollarë që nga divorci me Bezos në vitin 2019. Ajo ka një pasuri me vlerë neto prej 37 miliardë eurosh sipas Forbes, e cila e vlerëson atë si gruan e katërt më të pasur në botë dhe është zotuar të japë gjysmën e pasurisë së saj gjatë gjithë jetës së saj.
Shumica e parave vijnë nga një aksion prej 4% në Amazon që u përfshi në zgjidhjen e divorcit të saj. Scott postoi në mediat sociale se paratë u ishin dhënë grupeve për punën e tyre të jashtëzakonshme duke avancuar zërat dhe mundësitë e individëve dhe familjeve me mjete të pakta ose modeste dhe grupeve që janë përballur me diskriminim dhe pengesa të tjera sistematike.
Rikujtojmë, se rreth dy vite më parë MacKenzie bëri një kërkesë për divorc nga bashkëshorti i saj i dytë, Dan Jewett, pas më pak se dy vitesh martesë. Sipas dokumenteve të siguruara nga New York Times, Jewett nuk e kundërshtoi divorcin dhe ndarja e pasurisë tashmë është përcaktuar në një marrëveshje paramartesore.
Ish-çifti u martua në heshtje në mars 2021. Në biografinë e saj në Amazon gjithashtu u fshi plotësisht çdo përmendje e burrit të saj të dytë. Divorci i Scott vjen 4 vjet pasi ajo dhe Jeff Bezos njoftuan se po ndaheshin pas 25 vitesh martesë. Pas divorcit të tyre, Scott u bë personi i 12-të më i pasur në botë pasi pasuritë e Bezos u ndanë në gjysmë.
