Një linjë ajrore japoneze ka nisur një shërbim të ri, i cili thuhet se do të lejojë pasagjerët të rezervojnë veshjet, të cilat do të lihen në vendin e tyre të qëndrimit. Pasagjerët do të mund të zgjedhin veshje të përmasave të ndryshme për çdo stinë dhe rast.
Japan Airlines ka hedhur një ide të re si një mënyrë për të reduktuar emetimet e karbonit. Linja ajrore ka bashkëpunuar me një nga korporatat më të mëdha japoneze, Sumitomo, për të ofruar një shërbim me qira të veshjeve për vizitorët atij vendi. Shërbimi quhet “Any Wear, Anywhere” (çdo veshje, kudo) dhe qëllimi është të inkurajojë pasagjerët të paketojnë më pak rroba në bagazhin e tyre, gjë që redukton konsumin e karburantit të linjës ajrore dhe rrjedhimisht emetimin e karbonit.
Pasagjerët do të jenë në gjendje të përdorin këtë faqe interneti dhe të rezervojnë një shërbim me qira të veshjeve paraprakisht. Është e nevojshme të futni informacione për fluturimin, madhësinë e veshjeve, kohëzgjatjen e qëndrimit dhe në cilin sezon do të udhëtoni të paktën një muaj përpara. Më pas, rrobat do të dërgohen direkt në akomodim dhe do të jenë gati për udhëtarin kur të mbërrijnë në vend.
Qiraja kushton nga katër deri në shtatë mijë jen (midis 25 deri 45 euro), në varësi të numrit të artikujve. Vizitorët mund të marrin me qira deri në tetë veshje për dy javë. Përveç sistemit të rezervimit online, Sumitomo mbikëqyr gjithashtu blerjen, larjen dhe dërgimin e veshjeve, në partneritet me një kompani pastrimi kimik dhe furnizues veshjesh.
Periudha provuese fillimisht do të jetë e kufizuar për vizitorët që mbërrijnë në vend duke përdorur Japan Airlines deri në gusht 2024. Megjithatë, nëse shërbimi rezulton i suksesshëm, Sumitomo mund të konsiderojë ta shpërndajë atë tek operatorë të tjerë, si American Airlines, British Airways, Cathay Pacific Airways dhe Malaysia Airlines.
