Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Sport

Muaj pozitiv për Shqipërinë e Kosovën në renditjen e FIFA-s!

Shtatori pozitiv i Kombëtares Kuqezi reflektohet edhe në renditjen botërore të FIFA-s. Shqipëria ngjit tre shkallë në përditësimin e fundit të klasifikimit global, duke u renditur në vendin e 66-të nga i 69-ti ku ndodhej një muaj më parë.

Rezultat pa dyshim i fitoreve 5-0 ndaj San Marinos dhe sidomos i suksesit 1-0 ndaj Hungarisë, me një shkallë më të lartë vlerësimi sa i përket koefiçentëve të FIFA-s. Këto ndeshje amortizuan ndikimin e humbjes ndaj Polonisë, në Varshavë.

Vendimtare për pozicionimin e Shqipërisë në renditjen botërore sa i përket këtij viti kalendarik do të jenë pa dyshim sfidat e tetorit, ku në program janë sërish dy përballje me Hungarinë e Poloninë, që do të vendosin praktikisht edhe mbi shanset e kuqezinjve për t’u renditur në vendin e dytë në grupin eliminator për kualifikueset e Katar 2022, duke qenë se bëhet fjalë për dy rivalë të drejtpërdrejtë.

Ndërkohë, rritje në klasifikimin e FIFA-s shënon edhe Kosova. Dardanët kanë fituar 17.26 pikë nga ndeshjet e shtatorit, ku skuadra e drejtuar nga Challandes shënoi 1 fitore ndaj Gjeorgjisë, barazoi me Greqinë dhe u mund nga Spanja.

Kosova aktualisht renditet në vendin e 109-të, duke konfirmuar progresin e vazhdueshëm në klasifikimin botëror.

Sa i përket Top 10-shes, në kryesim mbetet Belgjika, e ndjekur nga Brazili, Anglia  Franca dhe Italia, që edhe pse fitoi eventin më të rëndësishëm futbollistik të vitit, Kampionatin Europian, verën e shkuar, aktualisht gjendet e pesta në renditje.