Me qëllim lehtësimin e shërbimeve për drejtuesit e automjeteve, Drejtoria e Përgjithshme e Shërbimit të Transportit Rrugor, DPSHTRR njofton për një tjetër risi.
Rreth 115,000 qytetarë në vit marrin kartonin e ri të lejedrejtimit, për herë të parë dhe për rinovimet, çdo kategori lejedrejtimi, pranë 12 drejtorive rajonale dhe 16 nënzyrave anembanë vendit, 1-3 ditë pas aplikimit, përjashtuar Tiranën ku ky shërbim mundësohet brenda 30 minutave.
DPSHTRR njoftoi se për të eleminuar çdo vonesë përtej afateve të programuara dhe çdo risk spekulimi potencial, ka vendosur në funksionim modulin e ri online “Gjurmo lejedrejtimin” ku çdo i interesuar verifikon në kohë reale prodhimin dhe dërgimin e lejedrejtimit të ri në rajonalen apo në zyrën përkatëse.
Kështu i vijmë në ndihmë qytetarëve të mos bëhen pre e asnjë sorollatjeje por edhe disiplinojmë shërbimin për shpërndarje në afate. Brenda shkurtit do të përfshihen edhe kartonat e CAP, si edhe do të ndërveprohet në vijim edhe me e-Albania për pop-up informativ në llogarinë e qytetarit për dokumentat e reja nga DPSHTRR.
Për arsye sigurie, personalizimi i lejedrejtimit kryhet nga njësia përkatëse në Tiranë dhe kjo e bën të pashmangshme shpërndarjen pas 1-2-3 ditëve në qytetet e tjera sipas largësisë dhe korrierit. Synimi është që të mos zvarritet asnjë qytetar dhe të luftohet çdo tentativë korruptive apo akt abuziv.
