Anëtari i Kryesisë së Partisë Demokratike, Eno Bozdo deklaroi sot se “Qeveria Rama i ka “rilindur” rrugët duke i katërfishuar në kosto”. Në një deklaratë, theksoi standardin e PD-së në kohën kur qeveriste vendin, kur sipas tij, “1 km rrugë ndërtohej me 950 mijë euro, ndërsa qeveria Rama i ka “rilindur” rrugët duke i katërfishuar në kosto. Po ashtu, u ndal te “tenderimet e trefishta për të njëjtin segment rruge, duke akorduar fonde shtesë, krejtësisht abuzive dhe të pambështetura”.
Kemi shfaqjen e të njëjtëve emra përfituesish, ku “nxijnë” Gjoka dhe AlbStar, oligarkët e preferuar të Rama 1, 2 dhe 3 në Bashki dhe Rama 1, 2 dhe 3 në Qeveri. Në serialin “Nuk keni parë gjë akoma”, ky nuk është episodi i fundit. Por, një gjë duket qartë: Shqipëria në rrezik.
Bozdo solli fakte dhe shifra nga ndërtimi i rrugëve në vite:
Viti 2012
Në 7 muaj ndërtohet loti i parë i rrugës Kardhiq-Delvinë: 5.6 milion euro për 7 kilometra. Punë e “qeverisë Berisha” të Partisë Demokratike.
Shtator 2018
Loti 4 i tenderohet firmës “Gjoka Konstruksion”: 20 milion euro për 6.1 kilometra. Loti 5 i tenderohet firmës “Alb Star”: 14 milion euro për 3.3 kilometra.
Prill 2021
Autoriteti Rrugor Shqiptar për të njëjtin segment i akordon Gjoka Konstruksion një fond shtesë: 3.8 milion euro. ARRSH e zgjidh qesen me fond shtesë edhe për Alb Star-in: 2.6 milion euro.
Tetor 2018
ARRSH ia tenderon lotin 6, firmave Agbes dhe Arbëria: 20 milion euro për 4.5 kilometra.
Prill 2021
Autoriteti akordon, edhe për lotin 6, një fond shtesë: 3.9 milion euro.
Korrik 2020
Lotin 7 qeveria ia jep Gjoka Konstruksion: 15 milion euro.
Shkurt 2022
Firma Jubica merr tenderin për sinjalistikën rrugore: 1.8 milion euro.
Maj 2022
Firma Gener merr tenderin e sistemimit të skarpateve të rrugës: 11 milion euro.
