Kristen Stewart luan rolin kryesor, atë të Princeshës Diana në filmin “Spencer”. Filmi ka të bëjë me një fundjavë që Diana e kaloi në Sandringham gjatë pushimeve të fundvitit 1991. Atëherë ajo mori vendimin për t’u divorcuar nga Princi Charles.
Mënyra si Kristen ka portretizuar princeshën e ndjerë është vlerësuar shumë nga kritikët, megjithëse ajo nuk e ka problem nëse nuk merr çmimin Oscar për këtë. Në një intervistë të fundit me “Variety”, aktorja u shpreh:
Nuk më intereson nëse e marr çmimin. Oscar-ët janë një gjë kaq qesharake. Ka kaq shumë filma dhe shfaqje të jashtëzakonshme që mezi shihen. Unë vërtet e vlerësoj që diçka në të cilën jam përfshirë ka ndezur një bisedë kaq të madhe. Ne nuk bëjmë filma për të mos u lidhur me njëri-tjetrin.
Pavarësisht kritikës së mirë nga publiku, ekspertët mbretërorë kanë kritikuar filmin e ri “Spencer” me protagoniste aktoren Kristen Stewart duke thënë se i heq Princeshës Diana respektin dhe dinjitetin e saj dhe është i pajustifikueshëm sipas tyre. Skenat në shfaqjen e filmit biografik të Princeshës Diana, e cila ndërroi jetë në një aksident automobilistik në moshën 36–vjeçare, portretizojnë e atë duke shpërthyer në lot para djalit të saj Princit William kur lufton me çrregullimin e saj të të ngrënit dhe mënyrat se si ajo do që t’i bëjë keq vetes.
Së fundmi, ish-truproja i Princeshë Diana-s, Ken Wharfe ka folur për portretizimin e princeshës së ndjerë nga Kristen Stewart dhe vlerësoi performancën e saj në dramën “Spencer”. Wharfe shërbeu si oficer i mbrojtjes personale të Princeshës së Uellsit nga viti 1989 deri në vitin 1993. Ai u shpreh për “People” se:
Nga të gjithë njerëzit që kanë luajtur Dianën gjatë 10 viteve të fundit, ajo është më e afërta me të. Ajo arriti të përsosë sjelljet e saj.
Kristen Stewart është aktorja e tretë së fundmi që provon të shkëlqejë në rolin e princeshës, pas Emma Corrin dhe Elizabeth Debicki në “The Crown”. Referuar komenteve online, njerëzit vlerësojnë transformimin e aktores, qoftë fizikisht ashtu edhe në aktrim. Sipas tyre, Stewart ka goxha potencial, të cilin Larraín ka qenë në gjendje ta përcjellë te “Spencer”. Filmi do të dalë në kinema më 5 Nëntor.