Lufta në Ukrainë duket se ka përfshirë këdo, i gjithë populli është mobilizuar në frontin e luftës kundër forcave ruse. Daily Mail sjell rastin e dy nënave të reja nga qyteti i Odesës, të cilat deklarojnë se janë të gatshme të vrasin dhe të vriten për të mbrojtur vendin e tyre.
Para luftës Olena Lolesnyk dhe Kamila Suleymanova kryenin punë të zakonshme dhe kalonin kohën e lirë duke i çuar djemtë e tyre në plazhet dhe parqet e shumta të qytetit piktoresktë Odesës, i njohur ndryshe si “Perla e Detit të Zi”.
Por pasi luftanijet ruse kërcënuan se do të sulmonin portin e lashtë, këto gra të guximshme morën armët për të mbrojtur Ukrainën.
Olena, 30-vjeçe, dhe Kamila, 33-vjeçe, janë pjesë e njësisë së ushtrisë 3014 të Ukrainës, e cila është linja e fundit e mbrojtjes për Odesën.
“Jam gati të vras për të mbrojtur qytetin tim, familjen time, vendin tim”, tha Olena, pasi mori një çmim trimërie nga kryetari i bashkisë.
“Përpiqem të mos mendoj nëse mund të vdes, por jam e përgatitur të jap jetën time për të mbrojtur gjithçka që dua”.
Kamila shtoi: “Nëna ime nuk e di që unë kam shkuar në ushtri. Por ne duhet të mbrojmë tokën tonë. Është për fëmijët tanë”.
Gratë folën pasi morën pjesë në një ceremoni ushtarake për të nderuar Gardën Kombëtare të Ukrainës.
Të veshura me uniforma ngjyrë ushtarake, parzmore, kapele prej kallaji dhe me pushkë kallashnikov, ato qëndruan krah për krah me shokët e tyre meshkuj, teksa një bandë ushtarake luante në sfond.
