Në Oslo, të paktën dy persona humbën jetën nga të shtënat me armë zjarri në një diskotekë. Sipas policisë së kryeqytetit norvegjez, disa të tjerë mbetën të plagosur e janë në gjendje të rëndë shëndetësore. Të shënat ndodhën në një lokal të frekuentuar nga homoseksualë e që po mbipopullohet këto ditë edhe për shkak të paradës Oslo Pride. Ndërsa policia ndaloi një të dyshuar, një grua dëshmitare tregon:
Dukej një skenë lufte, me shumë njerëz të shtrirë në tokë e me plagë në kokë. Vrasësi ishte tepër i vendosur dhe i përqendruar, sidomos për pjesën ku duhej të shënjestronte. Kur e kuptova se ishte diçka serioze, arrita të largohesha. Një burrë qëndronte i shtrirë në tokë, mes një pellgu gjaku.
Të shtënat me armë zjarri u shënuan rreth orës 01:00 pas mesnate, në një zonë ku ndodhen klubi gay London Pub, ai i xhazit Herr Nilsen, si dhe një dyqan ushqimor.
Bilanci zyrtar i policisë norvegjeze konfirmon dy viktima e 14 të plagosur. Autorit të dyshuar iu sekuestruan dy armë, ndërsa u arrestua në kohë rekord.
Hetimet e deritanishme tregojnë se gjithçka u krye nga një person i vetëm, i cili nuk duket të ketë patur bashkëpunëtorë. Tashmë, autoritetet policore në kryeqytetin e Norvegjisë duhet të kujdesen të shtojnë masat e sigurisë për të garantuar mbarëvajtjen e paradës Oslo Pride, e planifikuar për t’u zhvilluar paraditen e sotme.