Tritol banesës së një oficeri policie në Shkodër, fatmirësisht pa të lënduar, por vetëm me dëme materiale. Lënda plasëse që shpërtheu në mëngjes herët, rreth orës 02:25 minuta shkaktoi dëmtime në shtëpinë në pronësi të Pëllumb Vukës, në Hot të Ri. Dëme pësoi edhe automjeti tip “Benz” i 49-vjeçarit, i cili bashkë me familjarët ndodhej në banesë. Vuka, i cili punon pranë Komisariatit të Policisë Shkodër deklaroi se “nuk ka konflikte personale”, ndërsa pista kryesore e hetimit është për shkak të detyrës.
Grupi hetimor nën drejtimin e Prokurorisë së Rrethit Gjyqësor Shkodër, po punon për zbardhjen dhe sqarimin e plotë të kësaj ngjarjeje, identifikimin dhe kapjen e autorit/ve.
Në pak më shumë se një muaj, ky është rasti i katërt që punonjës të Policisë Shkodër bëhen shënjestër e sulmeve të ngjashme, që tingëllojnë si paralajmërime, mbi përplasje të mundshme, kryesisht për shkak të detyrës.
Më 28 prill, automjeti i efektivit të Forcave Operacionale të Shkodrës, Dritan Turhani u shkrumbua pranë banesës së tij, në lagjen “Perash”.
Dy ngjarje të tjera u regjistruan në muajin që sapo lamë pas. Më 14 maj, iu vu flaka makinës së efektivit të Shkodrës, Sokol Kroni. Automjeti i djegur ishte parkuar në lagjen “Tre Heronjtë” të qytetit verior.
Më 20 maj, një sasi tritoli iu vendos një lokali në fshatin Grudë e Re të Shkodrës. Lokali ishte në pronësi të efektivit të policisë, Ndrek Rrasa, 46-vjeç. Rrasa, efektiv i policisë së Shkodrës pranë sektorit të patrullës deklaroi se nuk ka konflikt me persona të tjerë.
