Një javë para se gjermanët t’u drejtohen qendrave të votimeve për zgjedhjet federale, kandidati konservator për kancelar, Armin Laschet shprehu besimin te suksesi i tij, pavarësisht se vazhdon të mbetet pas në sondazhe.
Këto janë zgjedhje shumë të ngushta, një garë shumë e ngushtë.
Ndërkaq, ritheksoi qëndrimin kritik ndaj sondazheve të opinionit:
Sondazhet janë sondazhe, çdo ditë një sondazh i ri me një klik. Shumë njerëz nuk janë përfshirë në sondazhe të tilla.
Në anketimet e fundit, socialdemokratët e qendrës së majtë (SPD), me kandidatin për kancelar, Olaf Scholz, kanë qenë disa pikë përpara CDU-së dhe partisë së saj simotër bavareze, CSU, me rreth 25% mbështetje. Scholz premtoi më shumë apartamente të arsyeshme në çmim. Ai ka premtua se si kancelar do të kujdeset që të çojë përpara projektin e 400 mijë apartamenteve të reja dhe 100 mijë prej tyre do të jenë banesa sociale.
Anketuesit ende i shohin të Gjelbrit, me kandidaten e tyre Annalena Baerbock, në vendin e tretë. Në një sondazh të institutit të sondazheve Insa, që publikohet sot nga gazeta “Bild am Sonntag”, CDU-CSU ka pasur përfitime të vogla, por ende është 5 pikë përqindje prapa SPD-së. Vendi i SPD-së mbetet i pandryshuar, me mbështetjen e 26% të votuesve, ndërsa CDU-CSU ka 21%, 1 pikë përqindje më shumë se javën e kaluar. Të Gjelbrit, ende kanë 15% mbështetje. Sa i përket popullaritetit, Laschet ka pësuar një humbje të vogël të mëtejshme dhe mbetet qartazi prapa Scholz-it, i cili kryeson me 31%.
Me fushatën zgjedhore në Gjermani që ka hyrë në javën e fundit, të gjitha partitë përpiqen të bëjnë për vete të pavendosurit, por në garën për postin e kancelarit në finish mbërrijnë vetëm dy politikanë.