Struktura e posaçme parlamentare për reformat ka në dorë të gjejë mënyrën se si do të duhet të votojnë emigrantët për parlamentarët e vitit 2025.
Realizimi i këtij procesi për Komisionerin e Zgjedhjeve nuk shihet me optimizën, duke u shprehur se kjo e drejtë e diasporës mund të mos zbatohet sa kohë ende nuk është plotësuar ende boshllëku ligjor.
“Sa më shumë kohë kalon aq më shumë rrezikon votimin nga jashtë. Nëse në përfundim të këtij sesioni nuk do kemi plotësim të boshllëqeve ligjore për votimin nga jashtë, kam frikë se në mënyrë përfundimtare ky proces nuk do mund të realizohet”, u shpreh Celibashi.
Vonesa në plotësimin e vakuumit ligjor shoqërohet edhe me numrin e ulët të emigrantëve shqiptar që kanë deklaruar adresën e tyre të vendbanimit jashtë kufijve, element ky që për KQZ nuk reflekton realitetin e peshës elektorale të diasporës.
“Në dijeninë time janë 14 mijë qytetarë shqiptarë që kanë deklaruar vendbanimet e tyre të përhershme jashtë territorit të Republikës së Shqipërisë. Sipas të dhënave të INSTAT janë 1.7 milion qytetarë shqiptarë që banojnë jashtë territorit të Shqipërisë. 14 mijë krahasuar me një 1.7 milion mendoj se është një shifër jo përfaqësuese në numër”, tha ai.
Ditët që kalojnë në vlerësimin e Komisionerit Celibashi po rrezikojnë edhe shtrirjen e numërimit dhe votimit elektronik në të gjithë territorin e Shqipërisë.
Votimi jashtë vendit mund të ketë ndikim substancial në rezultatet e zgjedhjeve dhe si pasojë në jetën politike brenda shtetit, veçanërisht kur një shtet ka diasporë të madhe në proporcion me popullsinë brenda vendit – siç është edhe rasti i vendit tonë. Shqipëria është pjesë e grupit të vogël të shteteve anëtare të Këshilit të Evropës që nuk kanë në kushtetutën apo ligjin e tyre zgjedhor asnjë referencë ligjore për organizimin e zgjedheve nga jashtë vendit.
Vlen të theksohet se në vitin 2005, Asambleja Parlamentare e Këshillit të Evropës miratoi një Rezolutë (nr.1459/2005), duke i nxitur vendet anëtare t’u krijonin kushtet ligjore qytetarëve që jetonin jashtë vendit të merrnin pjesë në proçeset zgjedhore.
