Eggnog është një pije kremoze që ka një vend të çmuar në zemrat e shumë njerëzve nëpër botë gjatë stinës së dimirit.Prejardhja e kësaj pije shkon në Britaninë e Mesjetës, ku të pasurit e kohës e shijonin një pije të quajtur “posset,” e përbërë nga qumështi, veza dhe likeret e kohës. Më pas kjo pije evoluoi dhe arriti në kolonitë amerikane duke u përshtatur me shijet dhe traditat rajonale. Recetat tradicionale të Eggnog-ut përfshijnë zakonisht qumësht, kremë, sheqer dhe vezë të rrahura, të përziera me pak arrë moskat apo kanellë. Për një shije më të fortë, shtohen alkool si rum, apo uiski, duke i dhënë një aromë më të fortë
Eggnog-ut i atribuohet simbolika e festës, ngrohtisë dhe bashkësisë. Tekstura e saj kremoze dhe aroma e saj, sjellin një ndjesi rehatie dhe gëzimi, duke e bërë të njohur si një pjesë thelbësore të festave të fundvitit. Edhe pse kjo pije asociohet kryesisht me traditat amerikane dhe evropiane të festave, pije të ngjashme ekzistojnë në kultura të ndryshme. Për shembull, në Porto Riko, “coquito” është një version i bazuar në kokos me rum. Ndërkaq, në Meksikë, “rompope” është një pije e ngjashme e bërë me vanilje, qumësht dhe rum. Gjatë viteve, pija eggnog ka kaluar nëpër shumë adaptime, duke përfshirë versione pa laktozë ose vegane për ta përshtatur me preferencat dietike.Përtej shijes së shkëlqyeshme, kjo pije simbolizon miqësinë dhe traditën. Pihet pranë oxhakut, ndahet midis miqve dhe familjes, shpesh shoqëruar nga tregime e të qeshura në mesin e gëzimit të sezonit festiv. Pavarësisht nëse shërbehet i ngrohtë apo i ftohtë, me alkool ose pa alkool, kjo pije e dashur vazhdon të jetë një pjesë përbërëse e festave të fundvitit!
