Fitojnë Tirana dhe Partizani, Egnatia siguron për herë të parë në histori pjesëmarrjen në Europë. Feston edhe Teuta, ndërkohë që u mbyll pa fitues Bylis-Kukësi.
Bardheblutë e Orges Shehit triumfuan 1-3 në Laç, duke hedhur një hap drejt titullit kampion në Superiore. Goli i Florent Hasanit dhe dygolëshi i Ardit Hilës i dhuruan kampionëve në fuqi një fitore të madhe në Kurbin.
Goli i Saliou Guindo në minutat shtesë, i shërbeu vetëm për statistikë bardhezinjve. Tirana vijon të kryesojë kampionatin shqiptar me 63 pikë, dy më shumë se Partizani ndjekës.
“Demat” mposhtën 2-1 Vllazninë në kryeqytet. Arinaldo Rrapaj dhe Eljon Sota i dhuruan Partizanit avantazhin e dyfishtë në pjesën e parë. Shkodranët reaguan me Bekim Balajn, por nuk ia dolën të gjenin golin e barazimit.
Egnatia fitoi 3-2 përballë Erzenit (Dwamena 2x, Musta/Ademi, Kapllani), duke forcuar pozitat në vendin e tretë. Skuadra rrogozhinase do të luajë në Conference League. Teuta iu fal golit të shpejtë të Ledio Beqjes për të thyer 1-0 Kastriotin dhe për të parakaluar Laçin në renditje.
Ndërkohë, dramë dhe emocione në Bylis-Kukësi (1-1) . Vendasit kaluan në avantazh falë golit me penallti të Vangjel Zguros në “limite”, por me penallti shënuan edhe verilindorët me anë të kapitenit Gjelbrim Taipi (100+2′).
Skuadra ballshiote e mbylli ndeshjen me nëntë lojtarëve pas daljeve me të kuq të Joalisson dhe Zguros. Dy javë kanë mbetur për t’u luajtur deri në fundin e këtij sezoni në Abissnet Superiore.
